Thirumylai கயிலையே மயிலை

ஒரு அற்புத திருக்கயிலாய யாத்திரை

2011-09-13T09:13:00.000-07:00

ஓம் நமசிவாய

பொன்னார் மேனியனே புலித்தோலை அரைக்கசைத்து
மின்னார் செஞ்சடைமேல் மிளிர்கொன்றை அணிந்தவனே
மன்னே மாமணியே மழபாடியுள் மாணிக்கமே
அன்னே உன்னையல்லால் இனியாரை நிணைக்கேனே

அது என்ன அற்புத யாத்திரை என்று தலைப்பு என்று யோசிக்கின்றீர்களா? மேலேயுள்ள பதிகத்தையும் படத்தையும் பார்த்தவுடன் புரிந்திருக்குமே. ஆமாம் சிறப்பான ஒருவரின் திருக்கயிலாய யாத்திரை என்பதால்தான் இந்த யாத்திரை அற்புத யாத்திரை ஆனது. அந்த சிறப்பானவர் யார் என்று அறிந்து கொள்ள ஆவலாக உள்ளதா?

பித்தாபிறை சூடிப்பெரு மானேஅரு ளாளா
எத்தான்மற வாதேநினைக் கின்றேன்மனத் துன்னை
வைத்தாய் பெண்ணைத் தென்பால் வெண்ணெய் நல்லூர் அருள் துறையுள்
அத்தாவுனக் காளாய்இனி அல்லேனென் லாமே.

என்று இறைவனையே பித்தா என்றும் பொன்னார் மேனியனே என்றும் நம்பி என்றும் பாடிப்பரவிய வன்தொண்டர் இவர்.

தமக்காக பிரம்மனுன் திருமாலும் காணா மலர்ப்பாதம் நோக திருவாரூர் வீதியில் பரவையிடம் சிவபெருமானை தூது போக வைத்த எம்பிரான் தோழர் இவர்.

பத்தராய் பணிவார்கள் எல்லார்க்கும் அடியேன்
பரமனையே பாடுவார் அடியார்க்கும் அடியேன் என்று திருத்தொண்டர் புராணம் பாடி தொண்டருக்கும் தொண்டரானவர் இவர்.

தேவாரம் திருவாசகம் பாடி சைவம் வளர்த்த சைவசமயக்குரவர்கள் நால்வருள் ஒருவர்.

அற்பு தப்பழ ஆவணங் காட்டி
அடியனா வென்னை ஆளது கொண்ட
நற்ப தனை நள்ளாறனை என்று அவரே பாடியது போல கண்ணுதலானும், காம கோபனும், கனக மால் வரையுமான எம்பெருமானாலேயே தடுத்தாட்கொள்ளப்பட்ட சுந்தர மூர்த்தி நாயனார் சென்ற திருக்கயிலாய யாத்திரை என்பதால் இந்த யாத்திரை அற்புத யாத்திரை ஆனது. திருமயிலையில் ஆடி சுவாதியன்று நடைபெற்ற சுந்தரர் திருக்கயிலாயம் ஏகும் படங்கள் இப்பதிவில்.

சுந்தர மூர்த்தி நாயனார்

சுந்தர மூர்த்தி நாயனார், ஆலால சுந்தரர் என்ற திருநாமத்துடன் திருக்கயிலையிலே எம்பெருமானுக்கு கைங்கர்யம் செய்து வரும் காலத்தில் அங்கிருந்த இரு கந்தர்வ பெண்களை பார்த்து மையல் உற எம்பெருமானும் அவர்கள் மூவரையும் பூலோகத்தில் பிறக்க வைத்தார். அப்போது ஆலால சுந்தரர் தகுந்த காலத்தில் தன்னை தடுத்தாட்கொள்ள வேண்டும் என்று இறைவனை வேண்டிக்கொண்டார்.

திருமுனைப்பாடி நாட்டைச் சேர்ந்த திருநாவலூரில், ஆதி சைவ குலத்தில் சுந்தரர் பிறந்தார். இவரது தந்தையார் சடையனார், தாயார் இசைஞானியார். குழந்தைக்கு “நம்பி ஆரூரர்” என்ற பெயரிட்டு வளர்த்து வந்தனர். சிறு பிள்ளையாயிருக்கும்போதே குழந்தையின் அழகு தெய்வீகமாய் இருந்தது. பெற்றோரும் இத்தகைய பேரழகு வாய்ந்த குழந்தைக்குப் பல்வேறு அணிகலன்களால் அலங்கரித்து விட்டிருந்தனர். ஒரு நாள் நம்பி ஆரூரர் வீதியில் விளையாட்டுத் தேரான சிறு தேர் உருட்டி விளையாடிக் கொண்டிருந்தார். அப்போது திருமுனைப்பாடி நாட்டு மன்னன் ஆன நரசிங்கமுனையர் அவ்வழியே திருநாவலூர்க் கோயிலுக்கு வந்து எம்பெருமானைத் தரிசித்துவிட்டுத் திரும்பிக் கொண்டிருக்கையில் வீதியில் தேரை உருட்டிக் கொண்டிருந்த சிறுவனைக் கண்டு அவன் அழகில் தம்மை மறந்தார். தேரிலிருந்தும் இறங்கி அந்த தெய்வக் குழந்தையைக் கையில் தூக்கிக் கட்டி அணைத்து உச்சி முகந்தார்.இவரை தனது தத்துப்பிள்ளையாக்கிக்கொண்டார்.ஆரூரர் அரண்மனையில் ஒரு அரசகுமாரனைப் போல வாழத்தொடங்கினார். அரசர்க்குரிய அனைத்துக் கலைகளிலும் தேர்ச்சி பெற்றார். உரிய பருவத்தில் உபநயனமும் செய்து வைத்தான் மன்னன். பெற்றோர்கள் ஆரூரருக்கு விரைவில் திருமணம் செய்விக்க எண்ணம் கொள்ளவே. அரசரும் அவர்கள் விருப்பம் போல் மணப்பெண்ணைத் தேடித் தேர்ந்தெடுக்குமாறு கூற, பெற்றோர் ஆரூரருக்கு ஏற்ற பெண்ணைத் தேடினார்கள். நாவலூருக்கு அருகே உள்ள புத்தூர் என்ற ஊரிலுள்ள, சடங்கவி சிவாசாரியார் என்பவரின் புதல்வியை ஆரூரருக்குப் பார்த்து மணம் முடிக்க ஏற்பாடுகள் செய்யப் பட்டன.

தன் அன்பனை ஆட்கொண்டு அவனை தான் இந்த பூவுலகிற்கு வந்த கடமையை நிறைவேற்ற உதவிபுரிய திருவுளம் கொண்ட மாப்பெரும் கருணையன் மணநாள் அன்று கிழ வேதியர் வடிவில் அங்கு வந்த இறைவன், சுந்தரருடைய பாட்டனார் எழுதிக் கொடுத்ததாகச் சொல்லப்பட்ட ஒரு அற்புத ஓலையைக் காட்டிச் சுந்தரரும், அவர் வழித்தோன்றல்களும் தனக்கு அடிமை என்றார். கோபத்தில் நம்பி ஆரூரர் நீர் என்ன பித்தரா? என்று வினவினார். இல்லை இதோ உன் பாட்டனார் எழுதிக்கொடுத்த ஓலை என்று முதியவர் காண்பிக்க கோபத்தில் அதை ஆரூரர் கிழித்தெரிந்தார்.

சுந்தரருக்கு பூஜை

சேரமான் பெருமாள் நாயனார்

(எம்பெருமான் தோழரின் தோழர்)

எம்பெருமானுக்கு செய்யும் மலர் அலங்காரம் போலவே அவரது அன்பருக்கும் செய்துள்ள பாங்கை காணுங்களேன்.

சுந்தரை திருக்கயிலாயத்திற்கு அழைத்து செல்ல

வந்து காத்திருக்கும் வெள்ளை யாணை

இதனால் முதியவர் மூல ஓலை திருவெண்ணை நல்லூரில் உள்லதால் அங்கு சென்று வழக்கை ்தொடர்வோம் என இவ்வழக்கு திருவெண்னை நல்லலூர் சென்றது. அங்கே முதியவர் “திருநாவலூரில் இருக்கும் ஆதிசைவன் ஆகிய ஆரூரன் என்னும் பெயருள்ள நான், திருவெண்ணெய் நல்லூர் பித்தனுக்கு எழுதிக் கொடுத்தது என்னவெனில், நானும் என் வழிவரும் மரபினோரும் வழிவழியாய் இவருக்கு அடிமைத் தொழில் செய்து வருவோம் என்பதற்காக உள்ளும், புறமும் ஒருமைப்பட்டு எழுதிக் கொடுத்த ஓலை. இது என் சுய உணர்வோடு போடப் பட்ட கையொப்பம்.” என்ற ஓலையைக் காட்டினார், கையெழுத்தை சரி பார்த்த பின் பஞ்சாயத்தார் ஆரூரா நீ பித்தனுக்கு அடிமைதான் என்று தீர்ப்புக்கூறினர். ஆரூரருக்கு ஏதும் புரியாவிட்டாலும், அவையோர் சொல்லுக்குக் கட்டுப்பட்டுக் கீழ்ப்படிவதே தன் கடமை என உணர்ந்து தலை வணங்கித் தீர்ப்பை ஏற்றுக் கொண்டார்.

அவையோர் முதியவரிடம், “ ஐயா, ஓலையில் நீர் வெண்ணெய் நல்லூரில் இருப்பதாய்க் குறிப்பிட்டுள்ளீர். உம் இருப்பிடம் எதுவென எங்களுக்குக் காட்டுவீராக!” என்று கேட்க, எம்பெருமான் அவர்களை அழைத்துக் கொண்டு தம் இருப்பிடத்தைக் காட்டவேண்டி, அவ்வூரிலுள்ள திருவட்டுறை என்னும் கோயிலை அடைந்தார். அனைவரும் பின் தொடர்ந்து வர அம்முதியவராய் வந்த இறைவனோ, கோயிலுள் சென்றவர் மறைந்தார். பின் ஆரூரர் வேண்ட அந்தணராக வந்த ஈசன், தம் அருள் வடிவிலே, உமையாள் உடனிருக்க ரிஷபாரூடராய்க் காட்சி அளித்தார். இறைவனே வந்து தன்னைத் தடுத்தாட் கொண்டதை உணர்ந்த சுந்தரர், "பித்தா பிறை சூடி" என்ற தனது முதல் தேவாரப் பதிகத்தைப் பாடித் துதித்தார்.பின்னர் இறை தொண்டில் தன்னை ஈடுபடுத்திக்கொண்டார். சிவத்தலங்கள் தோறும் சென்று தேவாரப் பதிகங்கள் பாடி இறைவனைப் பணிந்தார். இவ்வாறு செல்லும் போது அம்பலக்கூத்தரின் அருளினால் இவருக்கும் சேர நாட்டை ஆண்டுகொண்டிருந்த சேரமான் பெருமாளுக்கும் நட்பு உண்டானது. இருவருமாக சேர்ந்து பல தலங்களுக்கு சென்று கறைகண்டனை, கங்கை மதி சூடியை, புலியதளாடையனை, வ்யோமகேசனை பலவாறு பதிகங்கள் பாடி போற்றினர்.

நெற்றிக்கண் உடையானை நீறுஏறுந் திருமேனிக்
குற்றமில் குணத்தானைக் கோணாதார் மனத்தானைப்
பற்றிப் பாம்(பு) அரை ஆர்த்த படிறன்தன் பனங்காட்டூர்ப்
பெற்றொன்(று) எறும்பிரானைப் பேசாதார்பேச் சென்னே.

திருக்கயிலாயத்திற்கு புறப்படுகின்றார்

திருவைந்தெழுத்தைக் கேட்டு பறக்கும் குதிரை

சுந்தரர் முதலில் திருவாருரில் பரவையாரை மணந்தார் பின்னர் திருவொற்றியூர் சென்ற சமயம் சங்கிலியாரையும் மணந்தார். அப்போது மகிழ மரத்தடியில் சங்கிலியாரருக்கு செய்து கொடுத்த சத்தியத்தை மீறி திருவொற்றியூரை விட்டு நீங்கியதால்தன் கண்களையும் இழந்து பின் இறை அருளால் கண் ஒளி திரும்பபெற்று தேவாரம் பாடி, கைலாயத்திலிருந்து வந்த பணி முடித்து கைலாயம் செல்ல இவருக்கு வெள்ளை யானை வந்தது. இவருடைய தோழரான சேரமான் பெருமாளும் அவருடன் கைலாயக் செல்ல வேண்டி ஓம் நமசிவாய என்னும் பஞ்சாக்ஷர மந்திரத்தை தன்னுடைய வெள்ளைக் குதிரையின் காதில் ஓதினார், உடனே அந்த குதிரையும் கயிலாயத்தை நோக்கி பறக்க ஆரம்பித்து விட்டது. எம் பெருமான் தோழர் சுந்தரரின் தோழர் திருவாஞ்சிக்களத்தைச் சார்ந்த சேரமான் பெருமாள் இவ்வாறு கைலாயம் செல்லும் போது திருக்கயிலாய உலா பாடினார்.

குதிரையில் சேரமான் பெருமாள் நாயனார்

ஆத ரம்பயி லாரூரர் தோழமை

சேர்தல் கொண்டவ ரோடே முன்நாளினில்

ஆடல் வெம்பரி மீதேறி மாகயி லையிலேகி

ஆதி யந்தவு லாவாசு பாடிய

சேரர் ....

என்று இதையே அருணகிரிநாதர் தமது திருப்புகழில் பாடுகிறார்.

இறைவன் பால் இவர் கொண்டிருந்த பக்தி "சக மார்க்கம்" என்று சொல்லப்படுகின்ற தோழமை வழியைச் சார்ந்தது. இறைவனைத் தனது தோழனாகக் கருதித் தனக்குத் தேவையானவற்றை எல்லாம் கேட்டுப் பெற்றுக்கொண்டாராம்.

நீள நினைந்தடியேன் உமைநித்தலுங் கைதொழுவேன்
வாளன கண்மடவாள் அவள்வாடி வருந்தாமே
கோளிலி எம்பெருமான் குண்டையூர்ச் சிலநெல்லுப் பெற்றேன்
ஆளிலை எம்பெருமான் அவைஅட்டித் தரப்பணியே.

என்று அவர் பாடிய தேவாரப் பதிகம் மூலம்,பரவையாருக்காக குண்டையூரில் தான் பெற்ற நெல்லை தனது ஊர் கொண்டு சேர்க்க இறைவனிடம் உதவி கேட்பதைக் காணலாம். இறைவனும் அக்கோரிக்கையை ஏற்று சிவகணங்களை அனுப்பி நெல்லை பரவையாரின் இல்லத்திற்கு அனுப்பி வைத்தார்.

சுந்தர மூர்த்தி நாயனாரும் அவரது நண்பர் சேரமான் பெருமாளும் திருக்கயிலை சென்ற நாள் ஆடி சுவாதி ஆகும். அன்றைய தினம் திரு மயிலையில் சுந்தரர் வெள்ளை யானையிலும், சேரமான் பெருமாள் குதிரையிலும் எழுந்தருளி அருள் பாலிக்கின்றனர். இந்த வருடம் இந்த வைபவத்தை காணும் பாக்கியம் கிட்டியது அந்த புகைப்படங்களை எப்போதும் போல் அன்பர்களாகிய உங்களுடன் பகிர்ந்து கொள்கிறேன் கண்டு இன்புறுங்கள்.

வண்தொண்டர் திருக்கயிலைக் செல்வதைக்காண

கூடி நிற்கும் அன்பர் குழாம்

கற்ப கத்தினைக் கனகமால் வரையை காம கோபணைக் கண்ணுதலானை
சொற்ப தப்பொருள் இருளறுத் அருளுந் தூய சோதியை வெண்ணெய்நல் லூரில்
அற்பு தப்பழ ஆவணங் காட்டி அடியனா வென்னை ஆளது கொண்ட
நற்ப தத்தை நள்ளாறனை அமுதை நாயினேன் மறந் என்நிணைக் கேனே.

அற்புத திருக்கயிலை யாத்திரை

இவ்வாறு சுந்தரரும் சேரமான் பெருமாளும் திருக்கயிலைச் சென்ற போது திருக்கயிலையில் கூடி இருந்த உபமன்யு முதலான முனிவர்களுக்கு ஒரு ஜோதியாக காட்சி கிடைத்ததாம். என்ன அற்புத திருக்கயிலாய யாத்திரையை கண்ட அனுபவம் எப்படி இருந்தது.

திருமயிலை அறுபத்து மூவர் திருவிழா -2

2011-09-13T09:09:00.000-07:00

இந்த பதிவிற்காக தாங்கள் LOGAN ஐயா அவர்களுக்கு மிக்க நன்றி சொல்ல வேண்டும். என்ன ஆயிற்று கடந்த மூன்று மாதங்களாக பதிவுகள் ஒன்றும் வரவில்லையே என்று பின்னூட்டம் இட்டிருந்தார் அவர்.

செப்டெம்பர் மாதம் யமுனோத்திரி, கங்கோத்திரி, பத்ரிநாத் யாத்திரை, பின்னர் டிசம்பர் மாதம் நவ பிருந்தாவனம், மந்திராலயம் யாத்திரை பின் வீட்டில் ஒரு விஷேசம் என்று இருப்பதாலும், இமயமலையின் இனிய பயணத்தைப் பற்றிய கட்டுரையை எழுதி வருவதாலும் சமயம் குறைவாக இருப்பதால் பதிவிட முடியவில்லை.

பதிவிடுதலை நிறுத்தி விடும் எண்ணம் இல்லை. முடிந்த அவனருளால் அவன் தரும் தரிசனங்களை அன்பர்களாகிய தங்களுடன் நிச்சயம் பகிர்ந்து கொள்ள அவன் அருள் புரியட்டும்.

வரம் தரும் திருமயிலையின் கற்பகாம்பாள்

கபாலீஸ்வர சுவாமியின் பின்னழகு

அம்பாளின் முன்னழகும் பின்னழகும்

இந்தப் பதிவின் ஒரு சிறப்பு அம்சம் இப்படங்கள் அனைத்தும் இரவில் எடுக்கப்பட்டவை. எப்போதும் அறுபத்து மூவர் திருவிழாவை இதுவரை பகலில் தரிசனம் செய்யும் பாக்கியம்தான் கிட்டியுள்ளது சிவசக்தியின் அருளால் இந்த வருடம் இரவில் வடக்கு மாட வீதியில் தரிசனம் செய்யும் பாக்கியம் கிட்டியது. மின்னொளியில் பஞ்ச மூர்த்திகளும் மற்ற தெய்வங்களும் அற்புத காட்சி தங்கள் முன்னே.

வள்ளி தெய்வாணை உடனுறை சிங்கார வேலவர்

அழகன் முருகனின் பின்னழகு

இந்த அறுபத்து மூவர் திருவிழாவின் ஒரு சிறப்பு கபாலீச்சுர தெய்வ மூர்த்தங்கள் மட்டுமல்ல திருமயிலையின் பல்வேறு ஆலயங்களின் மட்டும் அல்ல சிந்தாதிரிப் பேட்டையிலிருந்து முத்துக் குமரனும் இத்திருவிழாவில் வந்து பக்தர்களுக்கு அருட்காட்சி தருகின்றனர். அதனால் தானோ என்னவோ அறுபத்து மூவர் என்றவுடன் திருமயிலைதான் எல்லாருக்கும் நினைவுக்கு வருகின்றது. வருடா வருடம் கூட்டம் அதிகமாகிக்கொண்டுதான் செல்கின்றது. இந்த வருடம் அடியேன் இரவு சுமார் 9 மணிக்கு திருக்கயிலை நாதனாம் கபாலியை தரிசனம் செய்யும் போது அவர் அப்போது தான் வடக்கு மாட வீதிக்கு எழுந்தருளியிருந்தார்.

பெரியநாயகி உடனுறை வாலீஸ்வரர்

திருமயிலையில் கபாலீஸ்சுரம், வெள்ளீச்சுரம், வாலீஸ்வரம், காரணீஸ்வரம், முதலிய ஏழு சிவாலயங்கள் அமைந்துள்ளன.

சிந்தாதிரிப்பேட்டை முத்துக்குமரன்

முத்துக்குமரன் பின்னழகு

வள்ளுவரும் வாசுகியும்

மயிலையிலே கோயில் கொண்டாய் முண்டக கண்ணியம்மா

மயிலை நாதர் நாயகியே முண்டக கண்ணியம்மா

திருமயிலை அறுபத்து மூவர் திருவிழா - 2011

2011-09-13T09:03:00.000-07:00

பிறையணி படர்சடைமுடியிடை புனலுடை இறையவனை, நாதனாகிய நன்னெறிப் பொருளினை அம்பலத்தாடும் நர்த்தனனை, நீடிய நிமலனை, விரிகடலும் மண்ணும், விண்ணும், மிகுதீயும், புனலெறி காற்றாகி எண் திசையான எம்பிரானை, பொய்யேதுமில்லாத மெய்யன் தன்னை, புண்ணியனை, பல்லுயிர்க்கு துணையானானை, ஆதி மூர்த்தியை, அம்பலத்தானை, புவனம் கடந்தன்று பொன்னொளி மின்னும் தவளச்சடை முடி தாமரையானை, பாசம் நீங்கிய பசுவாகிய உயிர்களுக்கு பதியாகிய ஈசனை கற்றார்கள் ஏத்தும் கபாலீச்சுரம் அமர்ந்தானை, கண்ணார் கயிலை மலையானை திருமயிலையில் அருள் புரியும் கபாலியை

வேதியா, வேதகீதா, விண்ணவரண்ணா, என்றன்சோதியே, மலர்கள் தூவியொருங்கி நின்கழல்கள் காண பாதியோர் பெண்ணைக் கொண்டவனே, படர்சடை மதியஞ்சூடும் ஆதியே, ஆண்டவனே, அழகனே, அறிவனே என்று

அல்லும் பகலும் அனவரதமும் தம் உள்ளத்திலே கொண்டு, தமது உடல், பொருள், ஆவி அனைத்தையும் சிவத்தொண்டுக்காகவே தத்தம் செய்து, மெய்யிலே திருநீறு, வாயிலே திருவைந்தெழுத்து, நினைவிலே சிவ உருவு, நெஞ்சிலே சிவநேசம், உணர்விலே சிவபக்தி, சிந்தனையெல்லாம் சிவமயம் என்று வாழ்ந்து சிவத்தொண்டிற்காக, எவரும் செய்ய நினைக்கக் கூடிய செயல்களை செய்த தொண்டர்கள்தாம் 63 நாயன்மார்கள்.

சிவனடியே சிந்தித்து, சிவத் தொண்டிற்கே தங்களை அர்பணித்துக் கொண்டு, உடல் பொருள் ஆவி அனைத்தையும் அந்த சிவபெருமானுக்கே தத்தம் செய்த அன்பர்களை பெருமைப் படுத்தும் நாள். இறைவன் கழல் ஏத்தும் செல்வமே செல்வம், சிவத்தொண்டே தம் வாழ்க்கை இலட்சியமாக வாழ்ந்து பெறக்கரிய பேறு பெற்ற அறுபத்து மூவர்களுக்கும் ஐயன் அருள் வழங்கும் நாள்தான் அறுபத்து மூவர் திருவிழா.

முழுமுதற்க் கடவுள் கணேசன் முதலில் உலா

திருமயிலையின் கோலவிழியம்மன்

அன்பர்கள் ஐயனை வணங்கியபடி முன்னே செல்ல ஐயன் அவர்களுக்கு காட்சி கொடுத்துக் கொண்டே பின்னே செல்லும் நாள். மொத்த தமிழகமும் அந்த மாட வீதிகளிலே குவியும் நாள் மயிலையில் மற்ற தெய்வங்களும் ஐயனுடன் வலம் வரும் நாள் மண்குடத்திலே தாங்கள் வேண்டிக் கொண்டபடி பிரசாதம் இறைவனுக்கு படைத்து அதை அன்பர்களுக்கு வழங்கும் நாள். அறுபத்து மூவர் பெருவிழா என்று அழைக்கப்படும் அந்த நாளின் சிறப்பைக் கூறிக்கொண்டே செல்லலாம். 'தொண்டர் தன் பெருமை சொல்லவும் அரிதே" என்று வியந்து தமிழ் மூதாட்டி பாராட்டியது போல ஐயனின் தொண்டர்கள் அறுபத்து மூவரையும் சிறப்பிக்கும் விழா. இவர்கள் பல்வேறு கால கட்டங்களில் தமிழகத்தின் பல பகுதிகளில், பல்வேறு குலங்களில், தோன்றியும் கூட சிவபக்தி என்னும் ஒரே சீர்மை பெற்ற அருள் கூடாரத்துள் ஒன்றுபட்டவர்கள். இவர்களுள் கிரகஸ்தர்களும் உண்டு, பிரம்மச்சாரிகளும் உண்டு. இசைஞானியார், அனைத்துயிர்களுக்கும் அமுது படைக்கும் அந்த ஆண்டவனுக்கே அமுது படைத்த காரைக்கலம்மையார், கூன் பாண்டியனாய் இருந்து நின்ற சீர் நெடுமாறனாக ஞானசம்பந்தப் பெருமானால் மாற்றப்பட்ட பாண்டியனின் துணைவி மங்கையர்க்கரசியார் ஆகிய மூன்று பெண்களும் உண்டு.

திருஞான சம்பந்தரால் என்பிலிருந்து பெண்ணாகிய

அங்கம் பூம்பாவை

காலை சுமார் பத்து மனியளவில் தொடங்குகின்றது இந்த அற்புதத் திருவிழா.அம்மையின் ஞானப்பலுண்டு ஐயனிடம் பொற் தாளமும், முத்துப் பந்தலும், முத்துசிவிகையும் பெற்ற திருஞானசம்பந்தப்பெருமான் இந்த திருமயிலையில் நிகழ்த்திய அந்த அற்புத நிகழ்ச்சியாம் என்பான பெண்ணை உயிருடன் கொண்டு வந்த வரலற்றை ஐதீக முறைப்படி நிகழ்த்திக் காட்டுவதை மையமாகக் கொண்டே இவ்விழா சிறக்கின்றது. ஆலயத்திற்கு மேற் புறத்தில் உள்ள எட்டுக்கால் மண்டபத்திற்கு எழுந்தருளுகின்றார் ஞான சம்பந்தப்பெருமான் அவரது தந்தையார் சிவபாத இருதயரும் எழுந்தருளி அருள் பாலிக்கின்றார். அப்போது மயிலை அன்பர் சிவநேச செட்டியார் சம்பந்தருக்கென்று நிச்சியித்து வைத்திருந்து அரவம் தீண்டி இறந்த பூம்பாவையின் அஸ்தி (இன்று மலர்) கலசத்துடன் அங்கு எழுந்தருளுகின்றார். அம்மண்டபத்தில் அன்று கபாலீச்சுரம் அமர்ந்தான் திருவிழா காணாதே போதியோ பூம்பாவாய் என்று ஆளுடையப்பிள்ளையார் பாடிய பதிகத்தை இன்று ஓதுவா மூர்த்திகள் பாடுகின்றார். சம்பந்தப்பெருமானே பதிகம் பாடுவதாக ஐதீகம், ஒவ்வொரு பாடலின் முடிவிலும் தூப தீப ஆராதனைகள் நிகழ்கின்றன. பத்தாவது பாடலை பாடி முடித்ததும் அந்த அஸ்தி கலசத்திலிருந்து அங்கம் பூம்பாவை உயிர் பெற்று எழுகின்ற வைபவம் பக்த கோடிகளின் பேரார்வ முழக்கத்திற்கிடையே நிகழ்கின்றது. சிவநேசர் அங்கம் பூம்பாவையை ஏற்றுக் கொள்ள வேண்ட இவள் நும் செல்வியல்ல இறையருளால் தோன்றிய எம் செல்வி என்று அங்கம் பூம்பாவையை சிவத்தொண்டில் ஈடுபடுத்திகின்றார் சம்பந்தப் பெருமான்.

மண்ணினில் பிறந்தார் பெறும் பயன் மதிசூடும்

அண்ணலார் அடியார்தம்மை அமுது செய்வித்தல்

கண்ணினால் அவர் நல்விழாப் பொலிவு கண்டு ஆர்தல்

உண்மையாம் எனில் உலகர் முன் வருகென உரைப்பார் என்று சேக்கிழார் பெருமான் திருத்தொண்டர் சீர் பரவும் பெரிய புராணத்தில் அங்கம் பூம்பாவையை உயிருடன் ஞான சம்பந்த பெருமான் அம்மையப்பர் அருளால் எழுப்பிய அற்புதத்தை பாடுகின்றார்.

அங்கம் பூம்பாவையும் அவரது தகப்பனார்
சிவநேச செட்டியாரும்

மாலை 3 மணியளவில் அம்மையப்பர் 63 நாயன்மார்களுக்கு அருட்காட்சி தரும் நிகழ்ச்சி துவங்குகின்றது ஐயன் சர்வ அலங்காரத்தில் வெள்ளி விமானத்திலும் அம்மையும், சண்முகரும், வினாயகரும், சண்டிகேஸ்வரரும் விமானத்தில் எழுந்தருளி அருள் பாலிக்கின்றனர். அலங்கார மண்டபத்தில் பஞ்ச மூர்த்திகளுக்கும் அலங்கார தீபத்துடன் சிறப்பு பூஜை நடைபெற்று, பின் திருக்கோவில் வலம் வந்து யாக சாலை பூஜை கண்டருளி பின் விமானங்களில் எழுந்தருளி கோபுர வாசல் வழியாக பஞ்ச மூர்த்திகள் பதினாறு கால் மண்டபம் வந்து அருட்காட்சி தருகின்றனர். முதலில் நால்வர் பெருமக்களும் தனித்தனி பல்லக்கில் வந்து அம்மையப்பர் முன் வந்து வணங்கி நிற்க ஒரே சமயத்தில் ஐயனுக்கும் நாயன்மார்களுக்கும் தீபாராதனை நடைபெறுகின்றது. பின் அவர்கள் அம்மையப்பரை வலம் வந்து அம்மையப்பரை நோக்கியபடி முன் செல்கின்றனர். பின் அங்கம் பூம்பாவையும் சிவநேச செட்டியாரும் வந்து அம்மையப்பரை வணங்கி செல்கின்றனர். பின் மற்ற நாயன்மார்கள் அனைவரும் பவளக்கால் சப்பரத்தில் , நால்வர் ஒரு சப்பரத்தில் எழுந்தருளி அருள் பெற்று செல்கின்றனர் அனைத்து நாயன்மார்களும் அம்மையப்பரை வணங்கி சென்ற பின் அம்மையப்பர் மண்டபத்தை விட்டு திருவீதி உலா புறப்படுகின்றனர். அப்போதே மாட வீதியெங்கும் மக்கள் வெள்ளம், திருமயிலையின் நடுவே உள்ள கோவிலை நோக்கி வருகின்ற எல்லா வழிகளிலும் மக்கள் கூட்டம் தேன் கூட்டை நோக்கி தேனீக்கள் வருவது போல அறுபத்து மூவர் திருவிழாவை காண வருகின்றது.

சைவ சமயக் குரவர் நால்வரில் மாணிக்க வாசகர்

அறுபத்து மூவரும் எழிலாக மாட வீதிகளில்

அம்மையப்பரை வணங்கியபடி வலம் வரும் அழகு

மாட வீதியில் மயிலையின் முண்டககக்கண்ணி அம்மன், கோலவிழியம்மன், திரௌபதி அம்மன், அங்காள பரமேஸ்வரி அம்மன் ஆகியோர் பக்தர்களுக்கு அருட் காட்சி வழங்கிக் கொண்டிருக்கின்றனர். பின் வினாயகப்பெருமான் முன்னே வர அறுபத்து மூவர்கள் ஐயனை நோக்கியபடி வரிசைக்கு இரண்டு சப்பரமாக வருகின்றனர் அவர்களுக்கு அருட்காடசி தந்த படி வெள்ளி விமானத்தில் கபாலீஸ்வரர் வருகின்றார் அவருக்குப் பின்னால் அம்மை கற்பகவல்லி, பின் சண்முகர் அவருக்குப்பின் சண்டிகேஸ்வரர் என்று கபாலீச்சுவரத்தின் மூர்த்திகள் வர அவர்களுக்குப் பின் வாசுகியுடன் உலக பொதுமறையாம் திருக்குறள் அருளிய திருவள்ளுவர் வருகின்றார். அவர்களுக்குப்பின் சிந்தாதிரிப்பேட்டையிலிருந்து வந்த சுப்பிரமணியரும் திருவீதி உலா வருகின்றார். பின் பிரம்மாண்டமாய் கோலவிழி அம்மன் வருகின்றார்.

வெள்ளி விமானத்தில் அருள் பாலிக்கும் கபாலீஸ்வரர்

ஐயனின் பின்னழகு

மக்கள் வெள்ளத்திற்கு நடுவே அலைகடலில் நாவாய்கள் வருவது போல விமானங்கள் ஆடி வரும் அழகை எப்படித்தான் வர்ணிப்பது? பார்த்தால் மட்டுமே அந்த தெய்வீக உணர்வை நாம் அறிய முடியும். இன்றைய நாள் ஐயனுக்கு மண் கலயத்தில் கரும்பு சக்கரை வைத்து படைத்து அனைவருக்கும் அதை வழங்குவது மிகவும் சிறப்பான நேர்த்திக்கடன் ஆகும். பூம்பாவையை அஸ்தி கலசத்திலிருந்து ஞான சம்பந்தப்பெருமான் எழுப்பியது போல மண் கலயத்தில் நாம் எம் பெருமானுக்கு அமுது படைப்பதால் அனைத்து நன்மைகளையும் வழங்குகின்றார் என்பது ஐதீகம். அந்த மக்கள் வெள்ளத்தில் இன்னிசை வீணையர் யாழினர் ஒரு பால், இருக்கோடு தோத்திரம் இயம்புவர் ஒரு பால், துண்ணிய பினை மலர் கையினர் ஒருபால் தொழுகையர் துவள்கையர் ஒரு பால் கபாலி! கபாலி! என்று ஆற்றி அழுபவர் ஒரு பால் , கயிலையே மயிலை மயிலையே கயிலை என்று துதித்து நிற்பவர் ஒரு பால், தென்னாடுடைய சிவனே போற்றி! எந்நாட்டவர்க்கும் இறைவா போற்றி! என்று போற்றி துதித்து நெக்கு நெக்கு உருகி நிற்பவர் ஒரு பால். அம்மா கற்பகவல்லி நீயே துணை அம்மா என்று அம்மையை வேண்டிநிற்பவர் ஒரு பால் என்று அனைத்து தரத்து மக்களையும் காணலாம். அன்பர்களுக்கு பிஸ்கட், சாக்கலேட், பழச்சாறு, சக்கரைப் பொங்கல், தயிர் சாதம், சித்திரான்னம், தண்ணிர், நீர் மோர், தர்பூசணிப் பழம், என்று எல்லாவிதமான பிரசாதங்களையும் வாரி வழங்குகின்றனர். அதனால் மாட வீதிகள் அன்று அசுத்தமாவது உண்மை ஆனால் அது அந்த ஐயன் அம்மை மேல் அன்பர்கள் கொண்ட பக்திக்கு ஒரு சான்று.

விரை மலர் குழல்வல்லி மறைமலர் பதவல்லி விமலி கற்பகவல்லி
அறுபத்து மூவருக்கும் அருள் பாலிக்கும் கோலம்

அந்தி சாய்ந்தபின் அனைத்து விமானங்களிலும் மின் விளக்குகள் ஒளிரத் தொடங்குகின்றன. அந்த அற்புதக் காடசி நம்மை சொர்க்க லோகத்திற்கே அழைத்து செல்கின்றது. மாட வீதிகளில் உள்ள கட்டிடங்களில் கூட மின் விளக்குகள் குறிப்பாக வெள்ளீசுரர் கோபுரம் மின் விளக்குகளில் மின்னும் அழகே அழகு. நேரம் செல்ல செல்ல மக்கள் வெள்ளமும் அதிகமாகின்றது திருவீதி உலா நகர்வது இப்போது எறும்பு ஊர்வது போல ஆகிவிடுகின்றது. மாட வீதி வலம் முடித்து ஐயன் திருக்கோவில் விழா அடையும் போது இரவு பத்து மணிக்கு மேல் ஆகிவிடுகின்றது. ஒரு முறை அந்த தெய்வீக தரிசனத்தை கண்டவர்கள் மறுபடியும் மறுபடியும் அறுபத்து மூவர் விழாவைக் காண வருகின்றனர் என்பதில் சிறிதும் ஐயமில்லை. அவ்வளவு கூட்டம் அந்த மாட வீதிகளில் அன்று கூடுகின்றது என்பதால் தானோ என்னவோ ஆதி காலம் முதல் தமிழ் திரைப்படங்களில் அறுபத்து மூவர் திருவிழாவில் குழந்தைகள் தொலைந்து போவது போல் காட்டுகின்றனர். நான் அன்பர்களுக்கு வைக்கும் வேண்டுகோள் ஒன்று தான் அறுபத்து மூவர் திருவிழா ஒரு மாபெரும் திருவிழா தொண்டர்களின் பெருமையை எடுத்துக் காட்டும் விழா கபாலீஸ்வரரின், கற்பகாம்பாளின் கருணையை பறை சாற்றும் விழா. ஒரு வாய்ப்பு கிடைத்தாலும் நிச்சயமாக சென்று அந்த திருவிழா கண்டு அம்மையப்பர் அருள் பெறுங்கள். .

அறுபத்து மூவர் திருவிழா தொடரும் ......

திருமயிலை கபாலீச்சுரம் - 7

2011-09-13T09:01:00.000-07:00

கபாலீஸ்வரர் உற்சவர்

ஐயன் சன்னதிக்கு செல்வதற்கு முன்னால் பலி பீடத்தில் நமது ஆணவம் , அகங்காரம் முதலிய மலங்களை பலியிட்டு தூய மனதுடன் பக்தியுடன் செல்லவேண்டும் என்பதை உணர்த்தவே பலிபீடம் கோவில்களில் கொடிமரத்துடன் சேர்த்து அமைக்கப்பட்டுள்ளன. தனி சன்னதியில் நந்தி தேவரை வணங்கி பின் துவார பாலகர்களிடம் அனுமதி வாங்கி ஐயன் சன்னதியில் நுழைகின்றோம், படிகளில் ஏறும் பொழுதே ஐயனின், அந்த வென்று வரு சூரனை கொன்று பகவான் சிறை விடுத்த வீரனை, மயூரனை, சிங்கார வேலனை வியந்தளித்த அருள் தெய்வமாம் கற்பக நாதனின், கபாலீஸ்வரரின் முழு தரிசனம் நன்றாக கிடைக்கின்றது, அந்த் சர்வேஸ்வரனை, நீலகண்டனை, அம்மை கற்பகவல்லி நேசனை, காமனை கண்ணால் எரித்த மஹேஸ்வரனை, பிரம்மன் சிரம் கொய்து கபாலமேந்திய கபாலியைக் கண்ணார கண்டு வணங்குகின்றோம், மனது தானாகவே சிவ புராணம் சொல்லத் தொடங்கிவிட்டது. ஐயன் லிங்க ரூபத்தில் எழுந்தருளி அருள் பாலிக்கின்றார். ஆவுடை வட்ட வடிவம், தாரை வலப்பக்கம், மேற்கு நோக்கிய சத்யோஜாத மூர்த்தியாய் எழுந்தருளி இருக்கிறார் ஐயன் இத்தலத்தில் எனவே அவரை

ஸத்யோஜாதம் ப்ரபத்யாமி ஸத்யோஜாதாய வை நமோ நம: பவேபவே நாதிபவே பவஸ்வ மாம் பவோத் பவாய நம:

என்னும் பஸ்சிம வக்த்ர ப்ரதி பாதக மந்திரத்தால் துதி செய்து வணங்குகின்றோம்.

ஐயனை மனதார வணங்கி சன்னதியை வலம் வரும் போது கிழக்கு நோக்கி வல்லி தேவசேனா சமேத சிங்கார வேலவர் உற்சவர் சன்னதி , தெற்கு நோக்கி சிவகாம சுந்தரி சமேத நடராஜர் சன்னதி, பன்னிருதிருமுறைக் கோவில், மாணிக்க வாசகர், வியாக்ரபாதர். பதஞ்சலியுடன் அருட்காட்சி தருகின்றார் ஆனந்த நடராஜ மூர்த்தி. அதற்கடுத்து மற்ற உற்சவர்கள் கிழக்கு நோக்கி சந்திரசேகரர் அம்பாளுடன், ஆதி சோமாஸ்கந்தர், தேவியர் இருவருடன் மயில் மேல் அமர்ந்த ஷண்முகர், பிக்ஷாடனர் அம்மையுடன், மான் மற்றும் குண்டோதரர்கள் (பூத கணங்கள்) அற்புதம், அடுத்து அழகிய வேலைப்பாட்டுடன் கூடிய ஆதி நடராஜர், பின் அறுபத்து மூவர்களின் செப்புத்திருமேனிகள், அஸ்திர தேவர், அருணகிரிநாதர் முதலியோரின் தெய்வ மூர்த்தங்கள் ருத்ராக்ஷ மண்டபத்தில் நேர்த்தியாக அமைக்கப்பட்டுள்ளன.

ஐயன் சன்னதியின் சுவற்றிலும் அருமையான தூண் சிற்பங்கள், வடக்கு கோஷ்டத்தில் ஸ்ரீ துர்க்கை அம்மனும் சிறந்த வரப்பிரசாதி, இராகு காலங்களில் அம்மனின் சன்னதியில் எலுமிச்சை விளக்குப் போட்டால் கேட்டது நடைபெறுகின்றது. ஏழு வாரம் தொடர்ந்து துர்க்கா பூஜை செய்து வந்தால் வேண்டிய குறைகளையெல்லாம் அம்பிகை தீர்த்து வைக்கிறாள் அடுத்த கோஷ்டத்தில் பிரம்மா. கோமுகி மற்றும் சண்டிகேஸ்வரர் சன்னதி வடக்குப் பக்கம் அமைந்துள்ளது. உற்சவர்கள் சன்னதி முடிந்தவுடன், கிழக்கு நோக்கி துர்கா, லக்ஷ்மி, சரஸ்வதி ஆகிய முப்பெரும் தேவியரின் சன்னதி, நாகங்கள். பைரவர், வீரபத்திரர் சைவ சமயக் குரவர்கள் நால்வர் திருமூர்த்தங்கள், மேற்கு நோக்கி பொள்ளாப் பிள்ளையார், அறுபத்து மூவரின் மூலவர்கள், திருத்தொண்டர் தொகை பாடிய சுந்தர மூர்த்தி நாயனார் , அவர் பாடிய வரிசைப்படி தில்லை வாழ் அந்தணர், திருநீலகண்டத்து குயவனார் தொடங்கி, சடையனார் இசை ஞானியார் ஈறாக அமைந்துள்ளனர் அறுபத்து மூவர் திருமூர்த்தங்கள். இவர்களுடன் சூரியன். பின்புற கோஷ்டத்தில் லிங்கோத்பவர். வடக்கு நோக்கியும் அறுபத்து மூவர்கள் தொடர்கின்றனர், சந்தான குரவர்கள் உமாபதி சிவம், மறை ஞான சிவம், அருணந்தி சிவம், மெய்கண்ட சிவம் ஆகியோர்களின் மூர்த்தங்களும் உள்ளன. தெற்கு கோஷ்டத்தில் ஆலமர் கடவுள் மற்றும் செல்வ கணபதி.

கிழக்கு நோக்கி தனி சன்னதியில் கற்பகாம்பாள் மற்றும் கபாலீஸ்வரர் (சோமாஸ்கந்தர்) உற்சவ மூர்த்திகளின் சன்னதி அன்னையின் பொற்பாதங்களையும் அங்குச பாசத்தையும் அபய வரத ஹஸ்தங்களையும் அற்புத தரிசிக்கலாம். நடுவில் பிரதோஷ நாயகர். ஐயன் கபாலீஸ்வரர் அழகிய சிம்மாதானத்தில் அழகிய பல வர்ண மலர் அலங்காரத்துடன் அற்புதமாக கந்தனுடனும் உமை அம்மையுடன் எழிலாக அருட்காட்சி தருகின்றார். பிரம்மோற்சவ காலங்களில் செய்யப்படும் அலங்காரம் போல இல்லாமல் எளிதாக இருந்தாலும் இந்த அலங்காரமும் அழகே. இப்பொழுது தினமும் இந்த பல வர்ண மலர்களால் அலங்காரம் செய்யப்படுகின்றது ஐயனுக்கு. பின்னும் கபாலீஸ்வரர் சன்னதியின் முன் வந்து நின்று

மயிலையிலே கோயில் கொண்டு அருள் பாலிக்கும் கயிலை நாதனை

சீர்கொண்ட கங்கையும் திங்களும் கொன்றையணி திகழ் கங்கையழகும் சிலைமதனை வென்ற வழிவலரு மிருதுனுதலினிற் திரிபுண்டரத்தினவழகும்

பார்கொண்டதிரு வயற்றரசி கற்பகவல்லி பாதத்திருக்குமழகும் பாதவிரு போதமகும் ஏழையேன் கண்டு முற்பழ வினையொழிப்பதென்றோ

காண்கொண்ட விடமுண்ட கண்ட நீலா இரு கரத்தொரு கபால சூலா கனமூலா கமநாலா மறைமேலாகிய சீலா களியுடனாடுகாலா

ஆர்கொண்ட கொள்கில்லுமுரிய கோலா சச்சிதானந்தமான லீலா அருமையடியார் நேச திருமயிலையூர் வாச அருள்புரி கபாலீசனே!

என்று மனமுருகப் கபாலீஸ்வரர் அஷ்டகத்தின் ஒரு பாடலை மனமுருகிப் பாடி கற்பூர ஆரத்தியுடன் தரிசித்து அவர் அருள் பெற்று இனி இத்திருக்கோவிலில் நடைபெறும் திருவிழாக்களின் பெருமையையும் சிறப்பையும் காணச்செல்வோம் வாருங்கள்

திருமயிலை கபாலீச்சுரம் - 6

2011-09-13T08:59:00.000-07:00

ஐயன் சன்னதி மேற்கு நோக்கி அமைந்துள்ளது அம்மன் சன்னதி தெற்கு நோக்கி அமைந்துள்ளது இருவருக்கும் சேர்ந்தார்ப் போல ஒரே மஹா மண்டபம். அந்த மஹா மண்டபத்தின் தூண்களிலே அனைத்து கடவுளர்களும் எழுந்தருளியிருப்பதால் இத்தலம் பூலோக கயிலாயம். இம்மண்டபத்தில் ஒரு தூணில் எழுந்தருளியுள்ள ஹனுமன் சிறந்த வரப்பிரசாதி. இம்மண்டபத்தில்தான் நந்தி தேவருக்கு கோபுரத்துடன் கூடிய சன்னதி உள்ளது.

மண்டபத்தூண்களில் உள்ள சில சிற்பங்கள்

இவருக்கு பிரதோஷம் தோறும் சிறப்பாக அபிஷேகமும் பூஜையும் நடைபெறுகின்றது. 108 சங்காபிஷேக சங்குகள் பூஜை செய்யப்படுவது நந்தி தேவரின் திருமுன் தான். ஆனி உத்திர பிரதோஷ வேளையிலும், ஆருத்ரா தரிசன அருணோதய காலத்திலும், அநாதிமல மூலனாகிய சிவ பரம்பொருள், அநாதிமல பக்தனாயிருக்கும் ஆன்மாக்கள பந்தம் வீடு என்னும் இருவகை நிலையினையடைந்த அவ்வனாதிமல பந்தத்தினின்றும் நீங்கி, உணர்பொருளும், உணர்வானும், உணர்வானும் உணர்வுமெனும் பகுப்பொழியாது, ஒளிந்த பானுப்புணர விழியும், நீர் நிழலும், தீயிருப்பும், புனல் உருவும், பருதி மீனும், துனைய இரண்டறு கலப்பில் (சிவமாகிய) தன்னுடங்கிய பேரின்பத்தைத் துய்த்து இடையறாமல் கும்பிடும் கொள்கையை பெறுதற் பொருட்டு தோற்றம், நிலை இறுதி, மறைப்பு, இருள் என்னும் பஞ்சகிருத்தியத் தாண்டவம் புரியும் தாண்டவேசனாகிய ஸ்ரீ நடராஜ பெருமானுக்கும் சிவகாம சுந்தரிக்கும் அபிஷேகம் நடப்பதும் இம்மண்டபத்தில்தான், பங்குனிப் பெருவிழா தொடக்கமாக சோமாஸ்கந்தராம் கபாலீஸ்வரருக்கு அபிஷேகமும் இம்மண்டபத்தில்தான். வெள்ளி தோறும், தங்கத்தேர் புறப்பாட்டின் போதும் அம்மன் கொலு வீற்றிருப்பதும் இம்மண்டபத்தில் தான். அம்மைக்கு முக்கியத்துவம் தருவது போல் இம்மண்டபத்தில் தெற்கு வடக்காக ஒன்பது தூண்கள். கிழக்கு வடக்காக நான்கு தூண்கள் என மொத்தம் 36 தூண்கள்.

கருணை தெய்வம் கற்பகவல்லி

கற்பகவல்லி நின் பொற்பதங்கள் பிடித்தேன்

நற்கதி அருள்வாய் அம்மா - தேவி

பற்பலரும் போற்றும் பதி மயிலாபுரியில்

சிற்பம் நிறைந்த உயர் சிங்காரக் கோவில் கொண்ட (கற்பகவல்லி)

என்ற படி அம்மண்டபத்தின் தூண்களிளும் தி்ருக்கோவிலெங்கும் பல அழகிய சிற்பங்கள் நிறைந்துள்ளன.

கபாலீஸ்வரரின் சன்னதிக்கு வடப்பக்கம் அம்மையின் சன்னதி, கேட்டவருக்கு கேட்ட வரம் அருளும் கற்பகமாய், பூஜையின் சிறப்பை உலகுக்கு தானே மயிலாய் வந்து உணர்த்தியவளாம், வாயிலார் நாயனார் சிவ பெருமான் திருவடி நிழற்புக, வாயிலாய் நின்றருள் செய்த அம்மை கற்பகவல்லி, பூரணி, மனோன்மணி, தயாபரி, பராபரி புராதனி தராதரம் எல்லாம் பொற்புடன் அளித்த சிவசக்தி இமவான் உதவு புத்ரி, மகமாயி என்று பல் வேறு நாமங்களால் தாச்சி அருணாசல முதலியாரால் பதிகம் பெற்ற அம்மை கருணை முகத்துடன், நான்கு கரங்களுடன் மேற் கரங்களில் அங்குச பாசம் தாங்கி வல கீழ்க்கரத்தால் அபயம் அளித்து இட கீழ்க்கரத்தால் என் பாதமே உங்களுக்கு சரணம் என்று வரத முத்திரையுடன் எழிலாய் நின்ற கோலத்தில் அருட் காட்சி தருகின்றாள். அம்மையைப் தரிசிக்கும் போதெல்லாம் மனதில் பெரிய நிம்மதி, நமது துயரங்களை எல்லாம் அவளது பாதத்தில் இறக்கி வைப்பதே ஒரு பெரிய நிம்மதி. அம்மையின் அருளை உணர கணம் அவள் சன்னதியில் நின்றால் போதும் அம்மைக்கு எவ்வளவு சேலைகள், மாலைகள் வந்து குவிகின்றன என்பதைப் பார்த்தால் போதும் வேறு எதுவும் சொல்ல வேண்டியது இல்லை. வீயாத முக்கண் இடத்தினில் வளரும் விரைமலர் குழல்வல்லி மறைமலர்ப் பதவல்லி, கற்பகவல்லியை வழிபடுவதால் உடல் சம்பந்தமான எந்த நோயானாலும் விரைவில் குணமாகிறது. கல்யாண வரம், குழந்தை வரம், ஐஸ்வர்யம் கிடைக்கும். நாம் கேட்பதை மட்டுமல்ல நமக்கு வேண்டுவது அனைத்தையும் தன் கடைக்கண் பார்வையினால் வழங்குபவள்தான் அன்னை. ஒவ்வொரு வெள்ளியும் சிறப்பானதுதான் மேருவை வளைத்தவன் இடத்தில் வளர் அமுதமாம் அம்மைக்கு,

அதிலும் ஆடி, தை வெள்ளிக்கிழமைகளில் அந்த அஞ்சுகக் கிளி மொழியாள் ஆனந்த வல்லி, சிங்காரவல்லி, கற்பகவல்லி 1008 தங்க காசுமாலை வைரக்கிளி தடாங்கம் அணிந்து எழிற் பொங்க காட்சி தரும் அம்பிகையை ஒரு தடவை தரிசனம் செய்தவர்கள் மறுபடியும் மறுபடியும் அம்மையை தரிசிக்க வருவார்கள் என்பதில் எந்த ஐயமும் தேவையில்லை. அம்மனுக்கு புஷ்பப்பாவாடை சார்த்துவது ஒரு சிறந்த நேர்த்திக்கடன். அன்னையை வேண்டிக் கொண்டால் அந்த வேண்டுதல்கள் நிறைவேறும் என்பது கண்கூடு. ஒவ்வொரு முறை செல்லும் போதும் அம்மைக்கு ஒரு வித அலங்காரம் கண்டு களிக்கலாம். அம்மையின் சன்னதியில் வலப்புற மூலையில் பள்ளியறை அமைந்துள்ளது. தினமும் காலையில் திருவனந்தல் பூஜை நடைபெறுகின்றது. ஒரு காலத்தில் அம்மையின் சன்னதியின் உட்பக்கம் முழுவதும் அம்மனின் பல்வேறு ரூபங்களைக் காட்டும் சித்திரங்கள் இருந்தன. ஆனால் தற்போது கற்சுவர்கள் சுத்தம் செய்யப்பட்டபின் அவைகளை எடுத்து விட்டனர். ஆயினும் அம்மையின் பின் பக்கம் அபிராமி அந்தாதி, லலிதா சகஸ்ரநாமம், கற்பகாம்பாள் பதிகம் ஆகியவை கல்வெட்டுக்களில் பதியப்பற்றுள்ளன. அம்மன் சன்னதியின் சுவர்களில் அழகான தூண்கள் செதுக்கப்பட்டுள்ளன. அபிராமி பட்டரால் இயற்றப்பட்ட அபிராமி அந்தாதியை அம்மையின் திருக்கோவிலிலே படித்து மனப்பாடம் செய்தவர்கள் பலர் அதில் அடியேனும் ஒருவன் கல்லூரியில் படிக்கும் போது வெள்ளிக்கிழமைகளில் அம்மனை தரிசிக்க சென்று அபிராமி அந்தாதியை மனப்பாடம் செய்தேன். திருக்கோவில் முழுவதும் பல்வேறு பதிகங்கள், ஸ்தோத்திரங்கள் கல்வெட்டுகளாக பதிக்கப்பட்டுள்ளதை இன்றும் காணலாம்.அம்மையின் சன்னதியின் முன் நின்று

.... நீ ஆதரித்து என்னை பாதுகாத்தருள் செய்து

நெடுநாட்படும் பாடெல்லாம்

நீக்கி அழியாத சுகமெய்தச் செய்தாலன்றி

நீச்சு நிலை இல்லையம்மா ( அம்மா கற்பகவல்லியே)

வீயாத முக்கண்ணிடத்தினில் வளர் அமுதமே

விரிபொழில் திருமயிலை வாழ்

விரைமலர்க்குழல் வல்லி மரைமலர்ப் பதவல்லி

விமலி கற்பகவல்லியே! என்று மனமுருக பாடி நெஞ்சுருகி வேண்டி கும்பிடும் போது அர்ச்ச்கர் கற்பூர ஆரத்தி காட்டுகின்றார், அம்மனுடைய கருணை ததும்பும் அந்த திருக்கண்கள் நமது சகல துன்பங்களையும் நீக்குகின்றன. அம்மனின் திருப்பாதத்திற்கும் கற்பூர ஆரத்தி காட்டுகின்றார் அர்ச்சகர் பாடகம் தண்டை கொலுசு சிலம்பு என்று சர்வாபரண பூஷிதையாக நிற்கும் இராஜாராஜேஸ்வரி, லலிதாம்பாள். மஹா திரிபுரசுந்தரியின் பொற்பாதங்களில் . இக்கோவிலில் அம்மனுக்கு அர்ச்சனை செய்யும் போது குங்குமத்தை அம்மனின் பாதத்தில் தான் செய்கின்றனர், நமக்கு வழங்கப்படும் குங்குமமும் அம்மன் திருப்பாதத்தில் பட்ட குங்குமம் தான்.

நாம் வேண்டுவதை எல்லாம் அன்னை நிறைவேற்றி வைக்கின்றாள் என்பதை அன்னை பல்வேறு முறை உணர்த்தியுள்ளாள். அடியேனுக்கு அம்மையும் நித்ய வாசம் செய்யும் திருக்கயிலை செல்லும் சந்தர்ப்பம் கிடைத்தது, எனவே அம்மையப்பரை தரிசிக்க செல்லும் போது ஒரு ருத்ராக்ஷம் அணிந்து செல்வோம் என்று ஒரு ருத்ராக்ஷம் வாங்கிக் கொண்டு முதன் முதலில் சென்றது அம்மனின் சன்னதிக்குத்தான். அர்ச்சகரிடம் கொடுத்து அம்மன் பாதத்தில் வைத்து எடுத்துத்தருமாறு கேட்டேன். அதை அம்மனின் பாதத்தில் வைத்த அவர் கற்பூர தீபம் கீட்டி விட்டு வெளியே வந்து இன்னும் சிறிது நேரம் அம்மனின் பாதத்திலே இருக்கட்டும் அம்மன் சன்னதியை சுற்றி விட்டு வா என்று கூறியது அந்த அம்மையே என்னை வாழ்த்தியது போல இருந்தது. அம்மன் உணர்த்தியது போல அருமையான தரிசனம் கிடைத்தது. அது போலவே அந்த தெய்வீக அனுபவத்தை அவனருளால் அவன் தாள் வணங்கி எழுதவும் பணித்தான் அந்த தியாகராஜர். ஆனால் அதை பதிப்பிக்க யார் முன் வருவார்கள் என்று தெரியவில்லை, வேறு கதி ஏது அந்த அம்மனிடமே சென்றேன் எழுதிய நூலை எடுத்துக்கொண்டு, அம்மனின் பாதத்தில் வைத்து எடுத்து கொடுத்த போது அம்மனின் மலரும் சேர்த்து கொடுத்தார் அர்ச்சகர், நான் அது வரை கவனிக்காத நான் செல்லலாம் என்று நினைக்காத பதிப்பகத்தாரை கண்ணில் பட வைத்தார் அன்னை, மனதில் சந்தேகத்துடன் அவர்களை அணுகிக் கேட்டேன் அவர்களும் புத்தகத்தை பதிப்பிக்க ஒத்துக்கொண்டனர் அனைத்தும் அம்மையின் திருவருளே.

கற்பகாம்பாள் சன்னதிக்கு தெற்குப்புற தூணில் இராமர், இலட்சுமணன், சீதை அனுமன் ஆகியோரின் திருவுருவங்கள் உள்ளன. அம்மன் உலா வருவதற்காக ஒரு தங்கத்தேர் உள்ளது இவ்வாலயத்தில் உற்சவங்கள் இல்லாத நாட்களில் மாலையில் இந்த 15 அடி தங்க ரதத்தில் உட்பிரகார வலம் வந்து நம்மை எல்லாம் இரட்சிக்கிறாள் மதவேளை முன் வெல்லாமல் வென்றவன் இடத்தில் வளர் அமுதமாம் கற்பகவல்லி அம்மையின் சன்னதியிலிருந்து பிரிய மனமில்லாமல் பிரிந்து இனி ஐயன் சன்னதிக்கு செல்வோமா?.

திருமயிலை கபாலீச்சுரம் 5

2011-09-13T08:58:00.000-07:00

நர்த்தன விநாயகர்

சிவநேச செட்டியார்

என்பாய் இருந்து பெண்ணான அங்கம் பூம்பாவை

அறுபத்து மூன்று நாயன்மார்கள்

ஐயனை வெள்ளி விமானத்தில் தரிசிக்கும் அறுபத்து மூவர்

கடற்கரையோரம் அமைந்த தலத்தின் நாயகர் மக்கள் கடலின் நடுவே

கபாலீஸ்வரர்
( நடுவில் ஸ்கந்தரை தரிசனம் செய்தீர்களா?)

கற்பகவல்லி அம்பாள்

அம்பாள் பின்னழகு

சிங்கார வேலவர்

சண்டிகேஸ்வரர்

பெரியநாயகி அம்பாள் சமேத வாலீஸ்வரர்

அறுபத்து மூவர் திருவிழா

திருமயிலையில் நடைபெற்று வரும் பங்குனிப்பெருவிழாவின் மகுடமான அறுபத்து மூவர் திருவிழா எட்டாம் நாள் திருவிழாவாகிய இன்றைய மாலை மிகவும் சிறப்பாக நடைபெற்றது. அதிலிருந்து சில காட்சிகள்.குறிப்பாக Logan ஐயா அவர்களின் நேயர் விருப்பமாக இப்பதிவு படங்களுடன் மட்டுமே இப்போது பதிவிடப்படுகின்றது.

திருமயிலை கபாலீச்சுரம் -4

2011-09-12T07:41:00.000-07:00

கயிலையே மயிலை, மயிலையே கயிலை

இனி இவ்வளவு சிறப்புகள் இத்திருக்கோவிலை வலம் வருவோமா? திருமயிலையின் நடுவே பரந்து விரிந்த மாடவீதிகளுடனும், ஐயன் நோக்கும் மேற்குப்பக்கத்தில் திருக்குளத்துடனும் மூன்று பிரகாரங்களுடன் அமைந்துள்ளது இத்திருக்கோயில். கிழக்கு இராஜ கோபுரம் நெடிதுயர்ந்து நம்மை வரவேற்கின்றது இந்த ஏழு நிலைக் கோபுரம். பஞ்ச வர்ணங்களால் வர்ணம் தீட்டப்பட்டு, புராண நிகழ்ச்சிகளை விளக்கும் அழகிய சுதைச் சிற்பங்கள் நிறைந்த 120 அடி உயர கோபுரம். கோபுரத்தில் சிவ சிவ என்னும் நாமமும், அன்னை சிவபூஜை செய்யும் கோலம் நியான் விளக்கில் இரவில் ஒளிரும் வண்ணம் அமைந்துள்ளது.

கோபுர தரிசனம் கோடி புண்ணியம் என்பர் அந்த கோபுரத்தை தரிசித்து உள்ளே நுழைந்தால் நர்த்தன வினாயகர் சன்னதி, ஐயனைப் போல கூத்தாடும் பிள்ளையாரைக் கண்டவுடன் ஒரு ஆனந்தம், தானாகவே கைகள் தலையில் குட்டிக்கொள்கின்றன, தோப்புக்கரணம் போடுகின்றோம். வினாயகர் சன்னதிக்கு வலப்புறம் உண்ணாமுலை அம்மை சமேத அண்ணாமலையார் சன்னதி ஐயன் கிழக்கு நோக்கிய முக மண்டலம் அம்மை தெற்கு நோக்கிய முக மண்டலம். பௌர்ணமியன்று இவருக்கு சிறப்பு பூஜைகள் செய்யப்படுகின்றது. நாகாபரணத்துடன் சிறப்பு அலங்காரத்துடன் பௌர்ணமியன்றும் சிறப்பாகவும், மற்ற நாட்களில் தினந்தோறும் அன்பர்கள் அண்ணாமலையாருக்கு அரோகரா என்று தேவாரம், திருவாசகம் பாடியும் வழிபடும் போது நாமும் இவரை வழிபடுவது ஒரு ஆனந்தம்.

மூஷிக வாகனத்தில் நர்த்தன விநாயகர்

எதிரே பசு மடம். அண்ணாமலையார் சன்னதியை அடுத்து சிங்கார வேலவர் சன்னதி. சக்தி வேல் பெற்ற சண்முகரும் ஐயனைப் போலவே மேற்கு நோக்கிய திருமுக மண்டலம் கொண்டு வள்ளி தேவசேனா சகிதம் காட்சி தருகின்றார் ஆறுமுகங்களுடன் மயிலின் பன்னிரண்டு கரங்களுடன் வலது காலை மடித்து இடது காலை தொங்கவிட்டுஅமர்ந்த கோலத்தில் தேவியர்கள் இருவரும் யானை வாகனத்தில் நின்ற கோலத்தில் அருள் பாலிக்கும் அந்த அழகைக் காண கண் கோடி வேண்டும். கந்தக் கடம்பனை, கார் மயில் வாகனனை கார்த்திகை மைந்தனை கண்டு கண்கள் குளமாகின்றன. இம்முருகன் மீது அருணகிரிநாதர்

அறமி லாவதி பாதக வஞ்சத் தொழிலாலே
அடிய னேன்மெலி வாகிம நஞ்சற் திளையாதே
திறல்கு லாவிய சேவடி வந்தித் த்தருள் கூடத்
தினமு மேமிக வாழ்வுறு மின்பைத் தருவாயே
விறல்நி சாரர் சேணைகளஞ்சப் பொரும் வேலா
விமல மாதபி ராமித ருஞ்செயப் புதல்வோனே
மறவல் வாணுதல் வேடைக் கொளும் பொற் புயவீரா
மயிலை மாநகர் மேவியக் கந்தப் பெருமாளே

என்று திருப்புகழ் பாடியுள்ளார். சிங்கார வேலவர் சன்னதி முன்னர் 16 தூண்கள் கொண்ட முன் பண்டபம் உள்ளது மண்டபத்தின் முகப்பில் அமைக்கப்பட்டுள்ள ஆறுமுகன் சுதைச் சிற்பம் அற்புதம் தேவியர் இருவரும் நின்ற கோலம் அற்புதம், மேலும் வீரபாகுவும், சவுந்திர சண்டிகேஸ்வரரும் சிங்கார வேலரை வணங்கிய நிலையில் சித்தரிக்கப்பட்டுள்ளனர். சிங்கார வேலருக்கு தனி கொடி மரம் உள்ளது. ஸ்கந்தர் சஷ்டி திருவிழாவின் போது கொடியேற்றத்துடன் விழா நடைபெறுகின்றது. அங்குரார்ப்பணம், கொடியேற்றம் விடையாற்றி என்று ஒரு திருவிழாவிற்க்கே உரிய அனைத்து அம்சங்களுடன் சிறப்பாக நடைபெறுகின்றது மஹா கந்த சஷ்டி விழா. முதல் நாள் மயிலுடன் நின்ற கோலத்தில் தேவியர் இருவருடன் சிங்கார வேலவர் யதாஸ்தானம் விடுத்து நவராத்திரி மண்டபத்திற்கு எழுந்த்ருளுகிறார். சிறப்பு அபிஷேகம் கண்டருளி பின் கொடியேற்றத்துடன் விழா தொடங்குகிறது. தினமும் காலையில் சிங்கார வேலவருக்கு சிறப்பு அபிஷேகம், மாலை விநாயகர், வீரபாகு, சவுந்திர சண்டிகேஸ்வரர் ஆகியோருடன் வீதி இரண்டாம் பிரகாரம் உலா வருகின்றார். கந்தர் சஷ்டியன்று வடக்கு மாட வீதியில் சூரசம்ஹாரம் சிறப்பாக நடைபெறுகின்றது. சூர சம்ஹாரத்திற்கு முருகன் திருத்தேரில் எழுந்தருளும் போது அன்னையரும் எழுந்தருளுகின்றார். சூரசம்ஹாரத்திற்கு தேரில் எழுந்தருளும் சுவாமி, சூரசம்ஹாரம் முடிந்த உடனே வெள்ளி மயில் வாகனத்தில் எழுந்தருளி அருள் பாலிக்கின்றார். ஏழாம் நாள் சிங்கார வேலவருக்கு ஏக தின லக்ஷார்ச்சனை, மாலை திருக்கல்யாணம். திருக்கல்யாணம் முடிந்த பின் ஐராவதாமாம் வெள்ளை யானை வாகனத்தில் மாட வீதி உலா வந்து அருள் புரிகின்றார் சிங்கார வேலவர், அடுத்த 6 நாட்கள் விடாயாற்றி உற்சவம். உற்சவ களைப்பு நீங்கிய பின் யதாஸ்தானம் திரும்புகின்றார். சிங்கார வேலவரின் சன்னத்திற்கெதிரே இவரை திருப்புகழால் பாடிப்பரவிய அருணகிரி நாதர் சன்னதியும் உள்ளது.

சிங்கார வேலவர்

சிங்கார வேலவரைத் தவிர மேலும் பழனி ஆண்டவருக்கும் ஒரு தனி சன்னதியுள்ளது. வடக்கு நோக்கி அருள் பாலிக்கின்றார் ஞான தண்டாயுத சுவாமி அருகிலேயே இத்தலத்திலே பிறந்து , வாழந்து

மன்னு சீர்மயி லைத்திரு மாநகர்த்
தொன்மை நீடிய சூத்திரத் தொல்குல
நன்மைசான்ற நலம்பெறத் தோன்றினார்;
தன்மை வாயிலார் என்னும் தபோதனர்

மாறா அருள் அரன் தன்னை மன ஆலயத்து இருத்தி
ஆறா அறிவாம் ஒளி விளக்கு ஏற்றி அகமலர்வாம்
வீறா மலர் அளித்து அன்பு எனும் மெய் அமிர்தம் கொடுத்தான்
வீறார் மயிலையுள் வாயிலான் என்று விளம்புவதே

என்று பெரிய புராணத்தில் சேக்கிழார் பெருமாள் பாடிய படி மனத்தையே செம்பொன் கோவிலாக்கி , அதில் உயர் ஞானத்தை விளக்கேற்ற ஆனந்த திருமஞ்சனம் ஆட்டி அன்பாகிய அமுதை நிவேதனமாக செய்து முக்தியும் அடைந்த 63 நாயன்மார்களுக்குள் ஒருவரான வாயிலார் நாயனார் சன்னதி. வாய் பேசாமல் மவுன விரதம் பூண்டு தியானம் செய்து வந்தார், "நான்" என்னும் அகந்தை எழாத அரும் தன்மையைப் பெற்றிருந்தார் எனவே வாயிலார் நாயனார் என்று திருப்பெயர் பெற்றார். வேளாளர் வகுப்பை சார்ந்தவர். மறவாமை என்னும் தியானத்தினால் மனத்திற் கோயில் அமைத்து ஞானம் என்னும் ஒளி விளக்கை ஏற்றி ஆனந்தம் என்னும் திருமஞ்சனம் ஆட்டி, அன்பு என்னும் அமுது படைத்து இறைவனை வழிபட்டு அருள் பெற்றவர். மார்கழி மாதம் ரேவதி நட்சத்திரத்தன்று இறைவனின் திருவடி அடைந்தார்.

வாயிலார் நாயனாரின் பெருமையை எம்பிரான் தோழர், வண்தொண்டர் சுந்தர மூர்த்தி சுவாமிகள் தமது 'திருத்தொண்டர் தொகையில்' போற்றி உருகிப் பாடும் போது கூறுகிறார்.

" துறைக் கண்ட செம்பவளம் இருளகற்றும் சோதித் தென் மயிலை வாயிலார் அடியார்க்கும் அடியேன்"

அதாவது 'கடற்கரையில் மலிந்து விளைந்திருக்கும் செந்நிறப் பவளங்களின் ஒளியால் இருளகன்று சோதிச்சுடராய் திகழும் மயிலாப்பூரில் அவதரித்த வாயிலார் நாயனாருக்கும் அடியேன் - என்றார் சுந்தர மூர்த்தி சுவாமிகள். வாயிலார் நாயனார் அன்னை கற்பகவல்லியை வணங்கி அமர்ந்திருக்கும் கோலத்தில் இவர் சன்னதி அமைந்துள்ளது.

நவராத்திரி மண்டபத்தூணில் அமைந்துள்ள சில அற்புத சிற்பங்கள்

வாயிலார் நாயனார் சன்னதிக்கு இடப்பக்கம் நவராத்திரி மண்டபம், கொடி மண்டபம் என்று அழைக்கப்படும் மண்டபம். அம்மை மயிலுருவாய் இறைவனை பூசிக்கும் சிற்பம் முதலான பல அழகான சிற்பங்கள் பஞ்ச மூர்த்திகளின் சிற்பங்கள் கொண்ட தூண்களை உடைய இந்த மண்டபத்தில் தான் அம்மை விரைமலர் குழல்வல்லி மறைமலர்ப்பதவல்லி, கற்பகவல்லி, நவராத்திரி கொலு தரிசனம் அருளுகின்றாள். பங்குனிப் பெருவிழாவின் முதல் நாள் கொடியேற்றத்தின் போது பஞ்ச மூர்த்திகள் இம்மண்டபத்தில் தான் எழுந்தருளி கொடியேற்றம் காண்கின்றனர். கார்த்திகை ஐந்தாம் வாரம் (மார்கழியில் வந்தால் கூட) 1008 சங்குகள் இம்மண்டபத்தில் வைத்து இரண்டு காலம் பூசை நடை பெற்று கபாலீஸ்வரருக்கு அபிஷேகம் செய்யப்படுகின்றது. மற்ற வாரங்கள் 108 சங்காபிஷேகம், சங்குகள் மஹா மண்டபத்தில் நந்திக்கு முன் வைத்து பூஜை செய்யப்பட்டு சுவாமிக்கு சங்காபிஷேகம் நடைபெறுகின்றது. பிரதோஷத்தன்று பிரதோஷ நாயகர் இம்மண்டபத்தில் எழுந்தருளி பின் கோவில் வலம் கண்டருளுகின்றார். கந்தர் சஷ்டி விழாவன்று சிங்கார வேலவர் பூஜை கண்டருள்வதும் இம்மண்டபத்தில்தான். கச்சேரிகள் மற்றும் சொற்பொழிவுகள் இம்மண்டபத்தில் தான் நடைபெறுகின்றது. இம்மண்டபத்தின் வலப்பக்கம் சமய நூல் நிலையம் உள்ளது. மண்டபத்தின் முன்னே அன்பர்கள் அமர்ந்து சுவாமி தரிசனம் செய்ய ஒரு பெரிய மண்டபம் கட்டப்பட்டுள்ளது.

ஊஞ்சல் சேவை சாதிக்கும் கற்பகவல்லி

இம்மண்டபத்தின் இடப்பக்கம் அம்மன் சன்னதிக்கு எதிரே 4 கால் ஊஞ்சல் மண்டபம். ஊஞ்சல் மண்டபத்திலிருந்து அன்னையை அற்புதமாக தரிசனம் செய்யலாம். தமிழ் மாதத்தின் கடைசி வெள்ளியன்று இம்மண்டபத்தில் தான் ஆதி பராசக்தி, ஜகத் ஜனனி, ஜகதாம்பாள், மஹா திரிபுர சுந்தரி, லலிதாம்பாள், அம்பிகை கற்பகாம்பாள் ஊஞ்சல் சேவை தந்தருளுகின்றாள். சிங்கார வேலவர் சன்னதிக்கு எதிரே அருணகிரி நாதர் சன்னதி, அருணகிரி நாதர் சன்னதிக்கு இடப்புறம் மேற்கு இராஜ கோபுரம். இக்கோபுரம் மூன்று நிலை கோபுரம். இக்கோபுரத்தில் நுழைந்தால் கொடி மரம், பலிபீடம். மேலே சுதை சிற்பத்தில் கற்பகாம்பாள் மயிலாய் சிவபூஜை செய்யும் கோலமும், அம்பாளது பூஜைக்கு மனம் மகிழ்ந்த மகேஸ்வரன் தோன்றி அம்மைக்கு அருள் பாலித்து ஏற்றுக் கொள்ளும் சிற்பங்கள் அற்புதமாக அமைக்கப்பட்டுள்ளன. இராஜ கோபுரத்தின் இடப்புறம் ஞானசம்பந்தர் என்பை பெண்ணுருவாக்கிய அங்கம் பூம்பாவை சன்னதி, திருஞானசம்பந்தரும் இச்சன்னதியில் எழுந்தருளியுள்ளார். அடுத்து மேற்கிலும் வடக்கிலும் வாகன மண்டபம் பல்வேறு பக்தர்கள் வடமேற்கு மூலையில் நின்றால் ஒரே சமயத்தில் அம்மன் கோபுர கலசங்களையும், இராஜ கோபுரத்தையும் தரிசிக்கலாம் எனவே பக்தர்கள் பலர் அங்கு நின்று கோபுர தரிசனம் செய்வதைக் காணலாம்.

திருக்கோவில் வலம் தொடரும் ............

திருமயிலை கபாலீச்சுரம் -3

2011-09-12T07:39:00.000-07:00

திருமயிலையூர் கபாலீசனே உன் பாதம் சரணம்

அக்காலத்திலேயே சென்னையில் இட நெருக்கடி இருந்திருக்கும் போல தோன்றுகிறது. தஞ்சை, திருச்சி மாவட்ட ஆலயங்களைப் போல பிரம்மாண்டமாக இல்லாமல் சிறிதாகவே உள்ளது கோவில் அம்மன் ஐயன் சன்னதியை சுற்றி ஒரு உள் பிரகாரம், மதில் சுவற்றைச் சுற்றியும் குளத்திற்கும் திருக்கோவிலுக்கும் இடையிலான இரண்டாவது பிரகாரம். ஐயன் திருவீதி விழா வரும் மாடவீதி மூன்றாவது பிரகாரம். இந்த மாட வீதி திருக்குளத்தையும் சுற்றி வருகின்றது. இந்த மாட வீதிகளின் அழகை இவ்வாறு கூறுவர்,

வைத்தீஸ்வரன் கோயில் விளக்கழகு;
மாயூரம் கோபுரம் அழகு;
திருவாரூர் தேரழகு;
மயிலாப்பூர் மாடவீதிகள் அழகு.

கபாலி தீர்த்தமும் இராஜ கோபுரங்களும்

இந்த மாடவீதிகளில் "காணக்கண் கோடி வேண்டும் கபாலியின் பவனி" என்று பாபநாசம் சிவன் பாடிய கபாலீஸ்வரரும், கற்பக வல்லியும், சிங்கார வேலவரும் விநாயகரும் சண்டிகேஸ்வரரும் திருவீதி வலம் வருகின்றனர். பங்குனிப் பெருவிழாவின் போது மக்கள் கூட்டத்தின் இடையில் பஞ்ச மூர்த்திகள் உலா வரும் அழகைக் கண்டோர் பேறு பெற்றோர் என்பதில் ஐயமில்லை.

கிழக்கு இராஜகோபுரம்

தல விருட்சம்: புன்னை, தீர்த்தம்- கபாலி தீர்த்தம். 1)கபாலி தீர்த்தம், 2)கடவுள் தீர்த்தம், 3)வேததீர்த்தம், 4)வாலி தீர்த்தம், 5)கங்கை தீர்த்தம் ,6) வெள்ளி தீர்த்தம், 7)இராம தீர்த்தம் என ஏழு தீர்த்தங்கள் உள்ளனவாக புராணங்கள் கூறுகின்றன. அதில் இப்போது கபாலி தீர்த்தம் மட்டும் தான் கபாலீச்சுரத்து அடுத்து மேற்கு பக்கத்தில் விளங்குகிறது. நடுவில் நீராழி மண்டபத்துடனும், மேலும் கரையில் நான்கு பக்கமும் மண்டபங்களுடன் கூடிய இக்குளத்திற்கும் ஒரு சுவையான வரலாறு உள்ளது.

கபாலி தீர்த்தம்

ஆதி காலத்தில் இந்த குளம் முகம்மதிய பக்கீர்களுக்கு சொந்தமானதாக இருந்தது. ஒரு சமயம் அந்த பக்கீர்கள் வெளியூர் சென்றிருந்த போது நவாபின் ஒரு பிராமண அமைச்சர் இத்திருக்குளத்தை வெட்டுவித்தார், திரும்பி வந்த பக்கீர்கள் நவாபிடம் முறையிட அவர் இந்துக்களும், முஸ்லிம்கள் இருவரும் இந்த குளத்தைப் பயன்படுத்துமாறு ஆனையிட்டார். மேலும் முகரம் மாதத்தின் பத்தாம் நாள் முஸ்லிம்கள் இந்த குளத்தைப் பயன்படுத்த அனுமதித்தார். இன்றும் நீதி மன்ற உத்தரவுப்படி முகரம் மற்றும் கோவில் பண்டிகை ஒரே நாளில் வந்தால் முதலில் முஸ்லிம்களுக்கே முன்னுரிமை தரப்படுகின்றது. இத்திருக்குளத்தின் படிகளை கட்டியவர் மயிலை முத்தாலப்ப முதலியார்.

ஐயனின் திருநாமம் கபாலீஸ்வரர் . கபாலி என்று அன்புடன் அன்பர்களால் அழைக்கப்படுகின்றார். சகள மூர்த்தியாக லிங்க ரூபத்தில் மேற்கு நோக்கிய திருமுக மண்டலத்துடன் சத்யோஜாத மூர்த்தமாய் எழுந்தருளி அருள் பாலிக்கின்றார் ஆணவம் கொண்ட பிரம்மனின் ஒரு சிரத்தை தன் நகத்தால் கிள்ளி எடுத்த அஷ்ட வீரட்ட நாயகர், திருஞான சம்பந்த சுவாமிகளால் நற்றாமரை மலர்மேல் நான்முகனும், நாராயணனும், முற்றாங்கு உணர்கிலா மூர்த்தி என்று சிறப்பிக்கப்பட்டவர். மயிலுருவாய் வழிபட்ட அம்மைக்கு மயிலுருவத்தை மாற்றி அருளியவர். பிரமன், மறைகள், இராமர், சிங்கார வேலர் ஆகியோர் வழிபட்ட பெருமான்.

கற்பகாம்பாள்

இவருக்கு கபாலீஸ்வரர் என்னும் பெயர் வர இரு ஐதீகங்கள் உள்ளன. முதலாவது பிரளய காலத்தில் சகல ஜீவராசிகளும் சிவபெருமானது காலடியிலே ஒடுங்குகின்றது. ஊழிக் காலம் முடிந்த பின் ஐயன் கையில் கபாலமேந்தி அண்ட சராசரங்களையும், சகல ஜீவராசிகளையும் மறுபடியும் உயிர்பிப்பார். அவரே எல்லாமாயும், எல்லா சக்திகளும் பெற்று எங்கும் நிறைந்த ஜோதியாக உள்ள ரூபமே கபாலீஸ்வரர் என்பது முதல் ஐதீகம்.

இரண்டாவது ஆணவம் கொண்ட பிரம்மனின் ஒரு தலையை எம்பெருமான் கொய்தார். இது எம்பெருமானின் அஷ்ட வீரச்செயல்களுள் ஒன்று. எனவே சிவபெருமான் பிரம்மசிரச்சேத மூர்த்தி என்றும் அழைக்கப்படுகிறார். அவ்வாறு கொய்த பிரம்ம கபாலம் ஐயன் கையிலேயே ஒட்டிக் கொண்டது ஐயனும் பிரம்ம கபாலத்தை கையில் ஏந்தி பிக்ஷாடணராய் அலைந்தார் இந்த கோலமே கபாலி. அன்னை கேட்டவர்க்கு கேட்ட வரம் அருளும் கற்பகமாய் அருள் பாலிக்க ஐயன் பிக்ஷடணராய் அருள் பாலிக்கின்றார்.

சைவர்களின் ஒரு பிரிவினரான கபாலிகர்கள் வழிபட்டதாலும் ஐயன் கபாலி என்ற நாமம் பெற்றிருக்கலாம். முற்காலத்தில் திருமயிலையிலும், திருவொற்றியூரிலும் கபாலிகர்கள் வழிபட்டிருக்கின்றனர்.

இந்த கபாலி நாதன் மேல் மெய்யன்பர்கள் வைத்திருக்கும் பக்திக்கு ஒரு எல்லையே இல்லை. இது அடியேனது அனுபவம். மாசி கடலாட்டு விழாவன்று அனைத்து திருக்கோவில்களில் இருந்தும் சுவாமி நீர் நிலைகளுக்கு எழுந்தருளி தீர்த்தம் கொடுப்பது வழக்கம் சென்னையின் மயிலையில் அமைந்துள்ள சைவத்திருத்தல தெய்வங்கள் எல்லாம் கலங்கரை விளக்கத்திற்கருகில் எழுந்தருளி தீர்த்தவாரி கண்டருளுவர். மயிலையில் 7 சிவத்தலங்கள் உள்ளன. அதல்லாமல் அம்மன் கோவில்களும் அனேகம். வைணவத் திருத்தலங்களின் மூர்த்திகள் சீரணி அரங்கத்திற்கருகில் எழுந்தருளி தீர்த்தவாரி கண்டருளுவர். ஒரு வருடம் மாசித் தீர்த்தவாரி கண்டருள சென்றிருந்தேன், காலை 9 மணிக்கே சென்று விட்டேன், வாலீசர், காரணிஸ்வரர், அப்பர் சுவாமிகள், அங்காள பரமேஸ்வரி என்று ஒவ்வொரு கோவிலில் இருந்தும் தெய்வ மூர்த்தங்கள் கடற்கரைக்கு எழுந்தருளினர், தீர்த்தவாரி நடைபெற்றது, ஒவ்வோரு தடவையும் குழுமியுள்ள பக்தர்கள் கடலில் குளித்தனர், ஆனால் யாரும் அங்கிருந்து நகரவில்லை. மணி 11 நெருங்கியது அனைவரும் ஆவலுடன் வழி மேல் விழி வைத்து காத்திருந்தனர், அப்போது வந்தவர்களின் வாயில் ஒரே கேள்வி, "கபாலி வந்து விட்டாரா?" என்பதுதான்.

மடலார்ந்த தெங்கின் மயிலையார் மாசிக்

கடலாட்டுக் கண்டான் கபாலீச்சுரம் அமர்ந்தான்

அடலானே றூரும் அடிகள் அடிபரவி

நடமாடல் காணாதே போதியோ பூம்பாவாய்!

பூம்பாவாய்! மடல்கள் நிறைந்த தென்னைமரங்கள் மிகுந்த மயிலாப்பூரில் மாசி மக நாளில் கடலாட்டுக் கண்ட களிப்போடு கபாலீச்சுரம் என்னும் கோயிலில் எழுந்தருளியிருப்பவனும், வலிமை பொருந்திய ரிஷப வாகனத்தில் ஊர்ந்து வருபவனும், ஆகிய பெருமான் புகழ் பரவி அப்பெருமான் உலா வரும் அந்த அழகைக் காணாது செல்வது முறையோ? என்று சம்பந்தப்பெருமான் பாடியபடி, பக்தர்கள் அனைவரும் கபாலிக்காக காத்திருந்து, தீர்த்தவாரி கண்டு கடலில் அப்பெருமானுடன் மூழ்கினர். கபாலி அங்கிருந்து புறப்பட்ட நிமிடம் அங்கு ஒருவரும் இல்லை. அவ்வளவு பக்தியா? அன்பா? பித்தா? மதிப்பா? கபாலியிடம், எல்லாம் கலந்த ஒன்று, இதுதான் கபாலியின் மகிமை. அடியார்கள் அனைவரும் கபாலி என்று ஒரு அந்நியோன்யத்துடன் அழைக்கும் அந்த அழகை என்னவென்று சொல்ல.

இராஜ கோபுரம் உள்புறம் - புன்னை வன நாதர் விமானம்

தொண்டை மண்டலத்தின் பாடல் பெற்ற 32 தலங்களுள் இது 24வது தலம். திருநாவுக்கரசர் மற்றும் திருஞான சம்பந்தர் இத்தலத்தைப்பற்றி பாடியுள்ளனர். இத்தலத்தின் புகழ் நந்தி கலம்பகம், கலிங்கத்துப்பரணி, பெரிய புராணம் ஆகியவற்றிலும் பேசப்பட்டுள்ளது. சென்ற நூற்றாண்டில் வாழ்ந்த வண்ணசரபம் தண்டபாணி சுவாமிகள் இந்த ஆலயத்தில் வீற்றிருக்கும் தெய்வங்களைப் பாடியுள்ளார். மயிலையில் பல காலம் தங்கி வாழந்த இசை வித்தகர் பாபநாசம் சிவன் வித்யா ரத்னா சத்வானந்தா போன்றோர், தமிழில் கபாலீஸ்வரரையும், கற்பகாம்பாளைப் பற்றியும் தேனான கீர்த்தனைகளை பாடியுள்ளார். தாச்சி அருணாசல முதலியார் கற்பகாம்பாளின் மேல் பதிகம் பாடியுள்ளார்.

விண்களார் தொழும் விளக்கிணைத்
துளக்கிலா விகிர்தனை விழவாரும்
மண்களார்துதித் தன்பரா யின்புறும்
வள்ளலை மருவித்தம்
கண்களார்தரக் கண்டு நங்
கடிக்குளத் துறைதரு கற்பகத்தைப்
பண்களார்தரப் பாடுவார்
கேடிலர் பழியிலர் புகழாமே. என்பது திருஞான சம்பந்தர் தேவாரம்

திருமயிலை கபாலீச்சுரம் -2

2011-09-12T07:36:00.000-07:00

ஆடும் மயிலாய் உருவெடுத்து அர்சித்த நாயகி கற்பகாம்பாள்

நவராத்திரி கொலு தர்பார் காட்சி

முதற்பதிவில் மயிலாப்பூரின் பல்வேறு நாமங்களையும் அதற்கான காரணங்களையும் கண்டோம். இப்பதிவில் திருமயிலாப்பூர் என்னும் திருநாமம் வரக்காரணமான அம்மையப்பரின் திருவிளையாடளையும், இத்திருவிளையாடல் பல் வேறு இடங்களில், நிகழ்ச்சிகளில் எப்படி இடம் பெறுகின்றது என்பதையும் காணலாம் அன்பர்களே.

ஒரு தூண் சிற்பத்திலே முழுக்கோவில்

ஒரு தூணின் ஒரு பக்கத்திலே இத்தலத்தையே சித்தரித்துள்ள சிற்பியின் திறமையை என்ன என்று சொல்ல, திருமயிலையின் கிழக்கு கோபுரம் 7 நிலை நெடிதுயர்ந்த இராஜகோபுரம். மேற்கு கோபுரம் மூன்று நிலை சிறிய கோபுரம். இந்த தூண் சிற்பத்தின் மேல் பகுதியில் 7 நிலை இராஜ கோபுரத்தையும் கீழ் பகுதியில் மூன்று நிலை இராஜ கோபுரத்தையும் காண்கின்றீர்கள். மேலும் புன்னை மரத்தடியில் ஈசனை அன்னை அர்சிக்கும் காட்சியையும் காண்கின்றீர்கள். இன்னும் ஒரு நுணுக்கமும் உள்ளது இச்சிற்பத்தில் மேற்கு கோபுரத்தில் நுழைந்தவுடன் ஐயனின் திருமுக தரிசனம் கிடைக்கும் என்பதையும், கபாலீஸ்வரப்பெருமானின் அருவுருவ லிங்கத்திருமேனி சத்யோஜாதம் எனப்படும் மேற்கு நோக்கிய திருமேனி. இத்தி்ருமேனியில் தாரை ஐயனின் வலப்பக்கம் இருக்கும், இச்சிற்பத்திலும் சிற்பி அவ்வாறே வடித்துள்ளார். இச்சிற்பத்தை நவராத்திரி மண்டபத்தின் ஒரு தூணில் காணலாம்.

இந்த சிற்பத்திலே ஐயனின் திருமேனி சத்யோஜாத மேனி, மேலே உள்ள மலர் மாலை, மயிலுருவில் சிவ பூஜை செய்யும் அன்னையின் அலகில் உள்ள புன்னை மலர், புன்னை மரத்தின், இலை, மலர்,காய், வணங்கி நிற்கும் அன்பர்கள் அனைவருமே அப்படியே தத்ரூபம், அன்று நடந்ததை இன்று நம் கண் முன் கொண்டு வந்து காட்டும் அற்புத நிவந்த கல்வெட்டின் சிற்பம். அன்னை கற்பகாம்பாளின் சன்னதிக்கு முன்னர் இச்சிற்பத்தைக் காணலாம்.

கருணைத்தெய்வம் கற்பகாம்பாள் மாதா மாதம் நிறை வெள்ளியன்று ஊஞ்சல் சேவை தந்தருளும் ஊஞ்சல் மண்டபத்தில் ஒரு தூணில் உள்ளது இச்சிற்பம். இவ்வாறு சிற்பிகள் செதுக்கிய இவ்வரலாறு என்ன, இத்தலம் மயிலாப்பூர் என்றழைக்கப்படும் காரணம் என்பதை அறிந்து கொள்ள ஆர்வமாக உள்ளதா? அந்த அம்மையப்பரின் நாடகத்தை கீழே காணுங்கள்.

ஒரு சமயம் பக்திப் பனியாய்க் கவிந்து இப்பாருலகத்தை காக்கும் பரமனுலகாம் கயிலங்கிரியில் சிவபெருமான் அம்மை பார்வதிக்கு, மலை மகளுக்கு, கௌரிக்கு, உமையம்மைக்கு ஓங்காரத்தின் தத்துவத்தை உபதேசம் செய்து கொண்டிருந்தார், அப்போது அம்மை அங்கு ஆடிக் கொண்டிருந்த மயிலை ஆர்வத்துடன் நோக்க கோபம் கொண்ட ஐயன் அம்மையை பூவுலகில் சென்று மயிலாக பிறக்குமாறும் தக்க சமயத்தில் வந்து ஆட்கொள்வதாகவும் கூறினார். அம்மையும் மயிலாப்பூர் வந்து புன்னை வனத்தில் புள்ளி மயில் உருவில் மாசக்தி அன்னை பிரணவ வடிவுடன் வாழ்ந்து கொண்டிருக்கும் போது கயிலை நாதராம் சிவபெருமான் அன்னை இல்லாமல் தவித்தார் சக்தி இல்லாமல் சிவம் ஏது, அவரே இப்பூவுலகம் வந்தார். ஒரு புன்னை மரத்தடியில் சிவலிங்க உருவுடன் அமர்ந்து அன்னையின் பூஜைக்காக காத்துக்கொண்டிருந்தார். மயில் உருவில் இருந்த அன்னை வாவியில் நீராடி ,தன் அலகினால் புன்னை மலர்களை எடுத்து சிவலிங்கத்தை சுற்றி வந்து அலகிலிருந்த மலர்களை இறைவனுக்கு அர்ச்சனை செய்து பூஜை செய்தாள் அம்மையின் பூஜையினால் பிரசன்னமான ஐயன் அம்மையை ஆட்கொண்டு இருவரும் அத்தலத்திலேயே , அம்மை வேண்டுவனருக்கு வேண்டும் வழங்கும் கற்பகாம்பாளாகவும், ஐயன் பிச்சாண்டியாக கபால நாதனாக கபாலீசுவரராகவும் திருக்கோவில் கொண்டனர். இப்பூவுலகத்தில் மாந்தர்களை உய்விக்க அம்மையும் ஐயனும் ஆடிய இந்த நாடகத்தை

ஆடும் மயிலாய் உருவெடுத்து அன்று இறைவன் திருத்தாள்

நாடி அர்சித்த நாயகியாம் நின் நின் நாமங்களைப்

பாடி உருகிப் பரவிப் பரவசம் ஆகும் அப்பாங்கு அருள்வாய்

காடெனவே பொழில் சூழ் மயிலாபுரி கற்பகமே!

என்றுப் பாடிப் பரவுகின்றனர் அடியார்கள்.

புன்னை வன நாதர் சன்னதி

திருக்கோவிலின் தலமரமான புன்னை மரத்தின் நிழலில் அமைந்துள்ளது புன்னை வன நாதர் சன்னதி. இச்சன்னதியில் அன்னை சிவ பூஜை செய்யும் கோலத்தில் அருள் பாலிக்கின்றாள். பழமை வாய்ந்த இம்மரத்தில் மஞ்சள் சரடு கட்டி மாங்கல்ய பாக்கியம் வேண்டியும், தொட்டில் கட்டில் குழந்தை பாக்கியம் வேண்டியும் அம்மையப்பரை வணங்குகின்றனர் பக்தர்கள்.

மயில் உருவில் அன்னை

பூத்துக்குலுங்கும் புன்னை மரம்

பங்குனி பௌர்ணமியின் போது திருக்கல்யாணத்திற்கு முன்பு இந்த மயிலாப்பூர் ஐதீகம் புன்னை வன நாதர் சன்னதியில் அரங்கேறுகின்றது. ஐயன் மண்டபத்திலி்ருந்து( திருக்கயிலாத்திலிருந்து) கிளம்பி வந்து அன்னை மயிலுருவில் பூஜை செய்யும் அழகை பார்த்து சொக்கி நிற்கின்றார். அன்னைக்கு தீபாராதணை ஆனவுடன் திரைச்சீலை விலக அங்கே புதுமணப்பென்ணாக சுய உருவில் கற்பகாம்பாள் அருட் காட்சி தருகின்றாள். அன்னைக்கு சிறப்பு பூஜைகள் நடைபெற்று பின்னர் அன்னை ஐயனை சுற்றி வந்து வணங்க பின்னர் இருவருமாய் கல்யாண மண்டபத்துக்கு எழுந்தருளி நாம் எல்லோரும் உய்ய திருக்கல்யாணம் நடைபெறுகின்றது.

மேலே கற்சிற்பங்களின் அம்மையப்பரின் நாடகத்தை கண்டு களித்தோம் இனி சுதை சிற்பங்களில் அதைக் கண்டு மகிழ்வோமா?

வாணியர் மண்டபத்தின் சுதை சிற்பம்

இராஜ கோபுரத்தின் சுதை சிற்பம்

மேற்கு கோபுர வாயிலில் நுழைந்தவுடன் தரிசிக்கும் சுதை சிற்பம்

அம்மையப்பரின் இந்த நாடகத்தால் இரண்டு பெருமைகளைப் பெற்றது. ஒன்று தொண்டின் பெருமை, இன்னொன்று இல்லை எனாது யாவர்க்கும் கற்பகமாய் அன்னை அருள் வழங்கும் பெருமை.

இனி மயிலாப்பூர் என்ற பெயர் வரக்காரணம், அம்மை மயிலாக பூசை செய்ததால் மயிலை என்ற பெயர் ஏற்பட்டது. மேலும் புன்னை வனத்தில் மயில்கள் நிறைந்திருந்து மயில்கள் அகவிய வண்ணம் இருந்ததால் மயிலாப்பு என்று திருநாவுக்கரசரால் அழைக்கப்பட்டு இன்றைக்கு மயிலாப்பூர் என்று அழைப்படுகின்றது என்போரும் உண்டு. இந்தியாவில் சுற்றுப்பயணம் செய்த கிரேக்க அறிஞர் தாலமி (காலம் கி.பி 119 -கி.பி 161) இத்தலத்தை தமது பயண நூலில் மலியார்பா என்று குறிப்படுகின்றார் "வடிவுடைய மங்கையுந் தாமுமெல்லாம் வருவாரை யெதிர் கண்டோம் மயிலாப்புள்ளே என்று” அப்பர் பெருமான் பாடியுள்ளார். 5ம் நூற்றாண்டில் திருமழிசை ஆழ்வார் "மாமயிலை" என்றும், 7ம் நூற்றாண்டில் திருஞான சம்பந்தர் "மட்டிட்ட புன்னையங்கானல் மடமயிலை" என்றும், திருமழிசை ஆழ்வார் "மாடமாமயிலை" என்றும் குறிப்பிடுகின்றார்.

பங்குனிப்பெருவிழாவின் முதல் நாள் இரவு ஐயன் ஸ்தல விருட்சமான புன்னை மர வாகன சேவை தந்தருளுகின்றார். அப்போதும் அன்னை மயிலுருவில் சிவ பூஜை செய்யும் கோலத்தில் கபாலீஸ்வரப்பெருமான் எழுந்தருளி அருள் பாலிக்கும் கோலம். முன்னே மயிலைக் காண்கிறோம். பின்னே உள்ளுறைப் பொருளாய் அன்னை. சகல ஜீவராசிகளிலும் உறைபவள் அவள் தான் என்பதை உணர்த்தவா இந்த நாடகம் நடந்தேறியது.

அன்னை சிவபூஜை செய்யும் ஓவியம்

திருஞான சம்பந்தரின் பதிகங்கள் மற்றும் திருமழிசை ஆழ்வாரின் பாசுரங்கள் அருணகிரி நாதரின் திருப்புகழ் முதலியவற்றில் கபாலீச்சுரம் முற்காலத்தில் கடற்கரையோரம் இருந்திருக்கின்றது என்று தெரிகின்றது, கடல் கொண்டதாலோ அல்லது போர்ச்சுகீசிரியர்கள் காலத்தில், (1565 ல் போர்ச்சிக்கீசியப் போரில்) அவ்வாலயம் அழிக்கப்பட்டு தற்போது உள்ள இடத்தில் 16ம் நூற்றாண்டில் கட்டப்பட்டுள்ளது.

மின் விளக்கு ஒளியில்

சாந்தோம் தேவாலயத்தில் 1923ம் ஆண்டில் நடந்த ஒரு அகழ்வாராய்ச்சியின் போது புராண திருக்கோவிலின் தூண்கள் மற்றும் இராஜ இராஜ சோழரின் சில கல்வெட்டுக்கள் கிடைத்துள்ளன. தற்போதைய கோவிலின் தூண்கள் விஜய நகர பாணியில் உள்ளன.

திருமயிலை பெருமைகள் வளரும்

திருமயிலை கபாலீச்சுரம் -1

2011-08-14T06:18:00.000-07:00

கற்பகவல்லி நின் பொற்பதங்கள் பிடித்தேன் நற்கதி அருள்வாய் அம்மா

ஒன்றாய் அரும்பி பலவாய் விரிந்து இந்த புவனமனைத்தையும் படைத்தும், காத்தும், அழித்தும், மறைத்தும், அருளியும் அலகிலா விளையாட்டுடை பஞ்ச கிருத்ய பராயணனாய், எல்லா உலகங்களுக்கும் நாயகனாய் , விறகில் தீயும், பாலில் படு நெய்யும் போல எங்கும் நிறைந்துள்ள அந்த சிவப்பரம்பொருள் நாம் எல்லோரும் உய்ய அருவமும் உருவமுமாகி லிங்கத்திருமேனியும், பல்வகை திருவுருவங்களும் தாங்கி பரத கண்டம் முழுவதும் எழுந்தருளி அருள் பாலிக்கும் திருத்தலங்கள் அனேகம், அவற்றுள் 12 ஜோதிர்லிங்கத் தலங்கள் மிகவும் சிறப்பு மிக்கவை. நமது தமிழ் நாட்டிலே சாக்கியர்களாலும், ஜைனர்களாலும் நமது சைவ சமயத்திற்கு இடர் வந்த போது இறையருளால் தோன்றி சைவ சமயத்திற்கு புத்துயிர் ஊட்டிய ஆளுடையப் பிள்ளை என்னும் திருஞான சம்பந்தர், அப்பர் என்னும் திருநாவுக்கரசர், மற்றும் வன் தொண்டர் என்றும் சுந்தரர் ஆகிய மூவராலும் பாடல் பெற்ற தலங்கள் தேவாரத்தலங்கள் என்றும் பாடல் பெற்ற தலங்கள் என்றும் போற்றப்படுகின்றன.

தருமமிகு சென்னையில் சென்னையில் பாடல் பெற்ற தலங்கள் மூன்று அவை மூன்றும் கடற்கரையோரம் அமைந்துள்ளன. வடக்கிலே திருவொற்றியூரும், மத்தியிலே திருமயிலையும், தெற்கிலே திருவான்மியூரும் அமைந்துள்ளன. இந்த மூன்று தலங்கள் இவற்றுள் நடு நாயகமாக அமைந்த திருமயிலையே நாம் காணப்போகும் தலம்.

ஆடும் மயிலாய் உருவெடுத்து அர்சித்த நாயகி கற்பகாம்பாள்

இந்த திருத்தலத்தின் பெருமைகளை எப்படித்தான் கூறுவது. அன்னை பார்வதியாரே தன் கால் பதித்து நடந்து மயில் வடிவம் கொண்டு சிவ பூஜை செய்த பரம பவித்திர பூமி இது அன்னை மயிலுருவில் பூஜை செய்ததால் மயிலாப்பூர் என்றழைக்கப்படும் தலம்.

சிங்கார வேலவர் சூரபத்மனை அழிக்க மயிலை நாதனை பூசித்து அம்மையிடம் சக்தி வேல் பெற்ற தலமானதால் கந்தபுரி என்று அழைக்கப்படும் ஸ்தலம்.சிங்கார வேலவர் அருணகிரி நாதரால் திருப்புகழ் பெற்ற தலம்.

புன்னை மரத்தடியில் அம்மை சிவபூஜை செய்ததால் புன்னை வனம்.

பிரம்மன் பூசித்து தன் இறுமாப்பு நீங்கி படைக்கும் ஆற்றலைப் பெற்ற தலமானதால் பிரம்மபுரி .

வேதங்கள் (மறைகள்) பூசித்து அரசு தொடுகையால் உண்டான பாவத்தைப் போக்கிய தலம் எனவே இத்தலம் வேதபுரி (வேத நகர்) என்றும் அழைக்கப்படுகின்றது.

திருமயிலை கிழக்கு இராஜகோபுரம்

இறைவன் மேற்கு முகமாய் (சத்யோஜாத மூர்த்தமாய்)கபாலீஸ்வரராய் எழுந்தருளி அருள் பாலிப்பதால் கபாலி நகரம் என்றும் அழைக்கப்படுகின்றது திருமயிலை.

எலியாக இருந்த போது திருமறைக்காட்டிலே எம்பெருமானின் கருவறையின் தீபத்தை தூண்டியதால் அடுத்த பிறவியில் அசுர ராஜனாக பிறந்த பலி சக்கரவர்த்தியிடம், மஹா விஷ்ணு வாமன அவதாரத்தில் வந்து மூவடி மண் கேட்ட போது அதை தடுக்க முயன்று கண்ணை இழந்த அசுர குரு சுக்கிராச்சியார் வழிபட்டு இழந்த கண்ணைப் பெற்ற தலம் எனவே இத்தலம் சுக்கிரபுரி என்றும் அழைக்கப்படுகின்றது.

இராமர் வழிபட்டு பகைவரை வென்று மனைவியை அடைந்த தால் தானே திருவிழா நடத்திய தலம்.

அம்மையின் ஞானப்பாலுண்ட திருஞானசம்பந்தர் சிவநேச செட்டியாரின் மகள் என்பை பூம்பாவை ஆக்கிய தலம், இன்றும் அந்த நிகழ்வை அறுபத்து மூவர் திருவிழாவாக கொண்டாடும் தலம்.

திருமயிலை ஐதீகங்கள்

தன் மனதையே ஞானக் கோவிலாகக் கொண்டு வழிபட்டு முக்தி அடைந்த வாயிலார் நாயனார் வாழ்ந்த தலம்.

மாலவன் புகழ் பாடிய பன்னிரண்டு ஆழ்வார்களுள் மூன்றாவது ஆழ்வாரான பேயாழ்வார் அவதரித்த தலம்.

உலகப் பொது மறையாம் திருக்குறளை வழங்கிய வள்ளுவர் வாசுகியுடன் வாழ்ந்த தலம்.

திருமயிலை என்றும், மாமயிலை என்றும் மயிலாப்பூர் அழைக்கபடும் திருமயிலை கபாலீச்சுரம் தான் இவ்வளவு பெருமைகள் பெற்ற தலம்.

கற்பகமும் கபாலியும்

பல்லாடு தலைசடை மேலுடையான் தன்னைப்

பாய்புலித்தோ லுடையானை பகவன் தன்னை

சொல்லோடு பொருளனைத்து மானான் தன்னைச்

சுடருருவில் என்பறாக் கோலத் தானை

அல்லாத காலனை முன் நடர்த்தான் தன்னை

ஆலின் கீழ் இருந்தானை அமுதானானைக்

கல்லாடை புனைந்தருளும் காபாலியைக்

கற்பகத்தைக் கண்ணாரக் கண்டேன் நானே.

என்று அப்பர் பெருமான் பாடியபடி ஐயன் கபாலியாகவும் அம்மை கற்பக வல்லியாகவும் எழுந்தருளி அருள் பாலிக்கும் , "மயிலையே கயிலை, கயிலையே மயிலை" என்னும் திருமயிலையில் இன்று தொடங்கி பங்குனி பௌர்ணமி வரை பங்குனிப்பெருவிழா சிறப்பாக நடைபெறும் இச்சமயத்தில் மயிலாப்பூர் திருத்தலத்தின் பெருமைகளைப்காண்போமா அன்பர்களே?

திருமயிலையின் சிறப்பே அதன் திருவிழாக்கள் தான் இத்தலத்தின் பல்வேறு திருவிழாக்களைக் காணாமல் போதியோ? பூம்பாவாய் என்று பதிகம் பாடித்தான் திருஞான சம்பந்தர் இறந்த பின் சாம்பலும் எலும்புமாக இருந்த பூம்பாவையை அங்கத்துடன் உயிருடன் எழுப்பினார் எனவே இத்தொடரில் இத்தலத்தின் பல்வேறு திருவிழாக்களின் தரிசனங்கள் இடம் பெறும் அனைவரும் வந்து தரிசித்து அருள் பெற வேண்டுகிறேன்.